Býhgalterlerdiń bylyǵy

Aıtalyq, mundaı qylmystar bilim salasynda da az jasalmapty. Mysaly, jýyrda prokýrorlar Jetisý oblysynyń Aqsý aýdanynda ózine joǵary jalaqyny zańsyz tóleý arqyly 40 mln teńgege jýyq bıýdjet qarajatyn urlady degen kúdikpen balabaqsha býhgalterin ustady. Jymqyrý faktisi shtat kestesi men banktik shottardy salystyrý kezinde anyqtalǵan. Onda tıisti jalaqy men naqty tólengen qarajat arasyndaǵy aıyrmashylyq baıqalǵan.

Osy fakti boıynsha prokýratýra Qylmystyq kodekstiń 189-baby 4-bóligi 2-tarmaǵy boıynsha sotqa deıingi tergep-tekserýdi bastady (asa iri mólsherde urlaý). Isti Jetisý oblysy prokýratýrasynyń sotqa deıingi tergep-tekserý basqarmasy tekserip jatyr. Bul baptyń sanksııasy belgili bir laýazymdardy atqarýǵa nemese bel­gili bir qyzmetpen aınalysý­ǵa ty­ıym sala otyryp, 12 jylǵa deıin bas bostandyǵynan aıyrýdy qarastyrady.

Sonymen qatar Aqmola oblysynda 83 mln teńgeden astam bıýdjet qarajatyn ıemdengen býhgalterler anyqtalyp otyr. Mysaly, Bulandy aýdanynda balabaqsha býh­galteri kásipkerlermen oıdan shyǵarylǵan mámileler jasaı otyryp, týystarynyń shotta­ryna aqsha aýdaryp kelgen. Aýda­rymdardyń shynaıylyǵyn kór­setý úshin býhgalter taýarlardy jetkizýge kelisimsharttar jasal­ǵan kásiporyndardyń ataýlaryn kórsetken. Banktik shottar onyń jaqyn týystaryna rásimdelip, býh­galter jumys istegen kezeńde bar­lyǵy 47 mln teńge aýdarylǵan.

Al Stepnogor qalasynyń mek­tepteriniń birinde býhgalter óz shotyna 36 mln teńgeni jalaqy retinde zańsyz aýdarǵan. Osy faktilerge oraı QK-niń 189-baby, 2-tarmaǵynyń 4-bóligi bo­ıynsha is tirkelip, Aqmola oblystyq prokýratýrasynyń arnaıy prokýrorlary jáne Aqmola oblysy boıynsha Ekonomıkalyq tergeý departamenti ony qarap jatyr.

Qazaq «Urlyq jerde jatpaıdy» deıdi. Kúnderdiń kúni áıteýir bir jerińdi tesip shyǵatyny aqıqat. Joǵa­rydaǵy qylmysy áshkerelengen adam­dardyń jaǵdaıy ózge de jan­darǵa «sabaq» bolsa jaqsy...