Platformanyń negizgi mindeti – jumys berýshiler men jumys izdeýshilerdi bir ortada biriktirý. Bastamany joǵary oqý oryndarynyń ókilderi kótergen. Búginde qosymshaǵa elimizdiń 20 óńirinen 500 jumys berýshi tirkelipti. Olar 1 500 bos jumys ornyn jarııalap úlgergen.
– NEET jastardyń jumyspen qamtylýy jáne olardyń úlesin azaıtý – qalalyq jastar saıasatynyń basym baǵyttarynyń biri. Osy oraıda basqarmada jumyssyzdyqpen kúresý úshin 4 ózekti mamandyq – qyzmet kórsetý, IT, qolóner jáne soft skils boıynsha jastarǵa arnalǵan qysqamerzimdi kýrstar iske qosyldy. Jańa daǵdylardy ıgerý jastarǵa perspektıvaly jáne qyzyqty mamandyqty tańdaýǵa, jumys tabýǵa, qoǵamdaǵy táýelsiz ómirge beıimdelýge jáne ózin-ózi júzege asyrýǵa múmkindik beredi. Búgingi tańda 3 850 jas 14 kýrs boıynsha bilim aldy. Bizder «Jobfair 365» platformasy arqyly da jastarǵa jańa múmkindikterge jol ashtyq. Qazir onda eń suranysqa ıe kólik jáne logıstıka salasyndaǵy 257 bos jumys orny jáne óndiris pen aýyl sharýashylyǵy salasyndaǵy 222 bos jumys orny, – dedi Jastar saıasaty jónindegi basqarma basshysynyń orynbasary Ázız Qajdenbek.
Al jármeńkeniń ózine 850 iri kompanııa qatysyp, 10 myńnan astam bos oryn usynylǵan. Nátıjesinde, kásibı taǵylymdamaǵa 3 800 adam jáne odan ári jumysqa ornalasý úshin 4 900 azamat shaqyrylypty.
Jalpy, elimizdiń túkpir-túkpirinde bos oryndar jármeńkesi jıi ótkizilip turady. Máselen, Aqparat jáne qoǵamdyq damý mınıstrligi Memlekettik jastar saıasatynyń 2023-2029 jyldarǵa arnalǵan tujyrymdamasy aıasynda «Tulga Bol» aksııasyn uıymdastyrdy. Munda túlekter men jastarǵa jumysqa ornalasý máseleleri, memlekettik baǵdarlamalar týraly aqparattandyrý, turǵyn úı satyp alý, 2,5% nesıe, óz isin ashý jáne basqa da baǵyttar jóninde keńes berildi. Is-shara 7 maýsym kúni Qyzylorda oblysynan bastaldy.
– Bul jastarǵa memleket tarapynan qoldaý kórsetý úshin uıymdastyrylyp otyr. Búginde oblys kóleminde 19 ben 35 jas aralyǵyndaǵy 250 myńǵa jýyq jas bar. Olardy qoǵamnyń belsendi azamattarynyń qataryna qosý – memlekettik mańyzy bar saıası baǵyttardyń biri. Syr jastary osy jármeńkede bos jumys oryndary, quqyqtyq saýattylyq jáne taǵy basqa ózderin tolǵandyrǵan saýaldar tóńireginde jaýap taba alady. Ár adam óz múmkindigin júıeli paıdalaný arqyly jetistikke jetedi. Osy maqsatta aımaqtan 611, basqa óńirlerden 600 bos jumys oryndary usynyldy, – dedi Qyzylorda oblystyq qoǵamdyq damý basqarmasy basshysynyń orynbasary Ýálıhan Ibraev.
Búginde elimizde jumyssyzdardyń sany 453,5 myń. Onyń ishindegi 15 pen 34 jastaǵylar 4,8%-dy quraıdy. Osy oraıda jastardy áleýmettendirýge baǵyttalǵan múmkindikter kerýeniniń taǵy birin respýblıka kóleminde Eńbek jáne halyqty áleýmettik qorǵaý mınıstrliginiń qoldaýymen «Amanat» partııasynyń «Jastar rýhy» jastar qanaty «Jastarǵa jumys» atty jobasyn uıymdastyryp jatyr.
– Joǵary oqý oryndarynyń túlekteri bos jumys oryndary úshin talas-tartysqa túsedi. Sondyqtan bos jumys oryndary týraly málimetti basqalardan buryn bilý mańyzdy. Bir mezgilde birneshe jumys berýshimen áńgimelesý óte yńǵaıly. Sonymen qatar ınternettegi nemese eńbek bırjasyndaǵy habarlandyrýlardan aıyrmashylyǵy – munda jumys berýshimen betpe-bet kezdesip, tolǵandyrǵan suraqty qoıýǵa bolady. Al júzbe-júz áńgimelesken kezde mindetti túrde kóp aqparat alasyz, – dedi stýdent Shyńǵys Turysbekov.
