Jolaýshy ólimine kim kináli?

Atyraý oblystyq polısııa departamentiniń bas­tyǵy Nurhat Orazbaevtyń málimetinshe, bıylǵy bes aıda mert bolǵandar sany 8,8%-ǵa ósken. Jol-kólik oqı­­­ǵalarynyń deni júrgizý­shilerdiń jyldamdyqty shamadan tys asyryp, qarsy ba­ǵytqa shyǵýynan bolady. Res­pýblıkalyq mańyzy bar tas joldarda normatıvke sáıkes táýligine 3 500 av­tokólik ótýge tıis. Qazir bul kórsetkish 9 myń avtokólikke jetken. Avtokólik aǵynynyń 3 esege artqany jol apatynyń ósýine áser etken.

Quqyqtyq statıstıka jáne arnaıy esepke alý jónindegi komıteti Atyraý oblystyq basqarmasynyń bastyǵy Ǵa­lymjan Qusannyń aıtýynsha, jol-kólik oqıǵasynyń sebebin anyqtaý úshin únemi taldaý júrgiziledi. Statıstıkalyq tal­­­daýǵa sáıkes jol-kólik oqı­­­ǵasynyń 48 paıyzy Aty­raý qalasynda tirkeletini anyqtalǵan. Jol apatynyń 24 paıyzy avtokólikterdiń soq­tyǵysýyna, 35 paıyzy jaıaý júrginshilerdi qaǵý de­regine baılanysty bolǵan.

«Jol apatynyń barlyǵy adamı faktordyń saldarynan bolatyny daý týdyrmaıdy. Buǵan birneshe sebep bar. Kólik júrgizýshileri óziniń nemese ózgeniń ómirin saqtaýǵa degen jaýapkershilikti se­zinbeı, jyldamdyqty sha­madan tys asyrady. Rýlde kele jatyp, mobıldi telefondy qoldanady. Joldaǵy manevr jasaý talaptaryn buzady. Balalardy arnaıy qurylǵysyz tasymaldaıdy. Eń bastysy, jolda júrý erejesiniń qaǵıdalaryn saq­ta­maýdyń sal­darynan apat­qa jıi ushy­raıdy», deıdi Patrýl­dik polısııa rota­synyń komandıri, polısııa kapıtany Ádilbek Shahmetov.

Onyń aıtýyna qaraǵanda, óńir aýmaǵymen ótetin res­pýblıkalyq mańyzy bar tas joldarda jyl basynan beri 38 jol-kólik oqıǵasy tirkelgen. Jol apatynyń saldarynan 33 adam mert bolyp, 57 adam ártúrli dene jaraqatyn alǵan. Sol sebepten, osyndaı joldarda kólik apatynyń aldyn alý úshin reıdtik is-sharalardy júrgizý qolǵa alynǵan. Alaı­da polısııa tarapynan osyndaı qadaǵalaý bolaǵynan qa­ramastan, júrgizýshiler basyp ozýǵa tyıym salynǵan jol belgisin elemeıdi. Sóıtip, jyldamdyqty shekten tys asyryp, aldyndaǵy kólikten ozý úshin joldyń qarsy baǵytyna shyǵady. Jyl basynan beri tas joldarda jyl­damdyq rejımin saqtamaǵan 12 809, basyp ozý erejesin buzǵan 611 júr­gizýshi ustalǵan. Máselen, 18 maýsymda Atyraý-Aqtóbe baǵytyndaǵy tas jolda Lada Priora pen Yutong avtobýsy soqtyǵysty. Jol apatynyń sal­darynan jeńil kóliktegi alty adam jantásilim etti. Kóz jumǵandardyń arasynda 1985 jylǵy áıel, 2013, 2016, 2019 jáne 2021 jylǵy balalar bar. Lada Priora jeńil kóliginiń 1982 jylǵy júrgizýshisi ob­lystyq aýrýhanada alǵan dene jaraqattary saldarynan esin jımaı, kóz jumdy. Mert bolǵandar bir otbasynyń músheleri – erli-zaıypty men tórt balasy.

Jeńil kólikpen soq­ty­ǵysqan Yutong avtobýsy Aty­raý qalasynan Qyzylqoǵa aýda­nyndaǵy Saǵyz stansasyna kún saıyn jolaýshy tasymaldap júrgen qoǵamdyq  kólik ekeni anyqtaldy. Jol apaty bolǵan sátte avtobýsta 26 jolaýshy bolǵan. Al 16 shildede jeti adamnyń ómirin qıǵan jol apaty Dos­sor-Qulsary-Beıneý ba­ǵy­tyndaǵy tas joldyń 82-sha­qyrymy tusynda tir­kel­di. Basyp ozýǵa tyıym sa­lynǵan jol belgisiniń dál janynda Chevrolet Cobalt markaly avtokóliginiń rólindegi júrgizýshi qarsy jolaqqa shy­ǵyp ketken. Sóıtip, Toyota Ipsum  kóligimen soqtyǵysqan. Jol-kólik oqıǵasynyń salda­rynan oqıǵa ornynda jeti adam – jeńil kóliktiń júr­gizýshisi men tórt jolaýshysy, Toyota Ipsum júrgizýshisi men bir jolaýshysy qaza tapty. Jol apatyna ushyraǵan eki avtokóliktiń júrgizýshisi de buryn birneshe ret jyl­dam­dyqty shamadan tys art­tyrǵany úshin ja­ýap­ker­shi­likke tartylǵany anyq­talǵan.