Buǵan 2019 jyly jeltoqsan aıynda qala máslıhatymen bekitilgen dızaın-kod negiz bolǵan. Alaıda pandemııa bastalyp jumys keıinge shegerilgen edi. Al 2023 jyldyń 4 sáýirinde Astana qalasyn damytý máseleleri jónindegi keńeste Prezıdent Q.Toqaev kóshe jarnamasyn ornalastyrýǵa qoıylatyn talaptardyń saqtalýyn baqylaýdy kúsheıtý týraly naqty tapsyrma bergen.
Jaýapty mindet «Astana-Jarnama» kommýnaldyq memlekettik mekemesine júkteldi. Qazirgi ýaqytta ǵımarattardyń nemese qurylystardyń qasbetine mańdaıshalardy ornalastyrý tujyrymdamasy ázirlendi. Onda bıznes ókilderine elordanyń sáýlettik sánin bir stılge keltirýdiń úlgisi kórsetilgen. Ýrbanıstıka ortalyǵy men ákimdik qyzmetkerleri ár aýdannyń kásipkerlerimen kezdesý uıymdastyryp, tujyrymdamany talqylady.
«Mańdaıshalar qasbettiń negizgi frızinen erekshelenetin fonsyz (sýbstratsyz) bolýy kerek. Negizgi jazý frız bıiktiginiń 70%-ynan aspaýy tıis. Barlyq belgiler qasbettiń bir syzyǵynda bolýy kerek jáne qajet bolǵan jaǵdaıda qasbettiń stıline beıimdelýi shart. Belgilerde monohromdy jáne únsiz tústerdi qoldanǵan jón. Belgili bir jaǵdaılarda, belginiń tehnıkalyq kúrdeliligi retinde, frızdiń túsine nemese qurylymyna uqsas fondyq sýbstratqa ruqsat etiledi. Bul jaǵdaıda frız nemese qasbet bóligi bastapqyda jiksiz bolýy kerek. Mańdaıshalardy jalpy sımmetrııany, qasbettiń vızýaldy qabyldaýynyń tutastyǵyn buzbaıtyndaı etip ornalastyrýy tıis. Belgi ǵımarattyń arhıtektýralyq elementterimen qabattaspaǵan jón», dedi «Astana-Jarnama» MKM basshysy Asylbek Tólemisuly.
Búgingi tańda «Astana-Jarnama» MKM mamandary jumys tártibin bekitken. Aldymen múlik ıeleriniń birlestigin eskertedi. Olar óz kezeginde shaǵyn jáne orta bıznes ókilderine habarlama taratady. Egerde kásipker mańdaıshany nemese jarnamany sheshýge kúshi jetpese aýdandyq ákimdik jumysshylary jiberiledi.
Birinshi kezektegi jumys elordanyń ortalyq kóshelerinen, atap aıtqanda B.Momyshuly dańǵylynan, №2 úıden, Respýblıka dańǵylynan, №5 úıden bastaldy. Apta saıyn úı-jaılardyń ıelerimen beıbereket ornalastyrylǵan jarnamany aýystyrý jaıynda kezdesýler jáne túsindirý jumysy júrgizilýde.
Máselen, «Kórkem» turǵyn úı kesheniniń qasbeti jyldam retke keltirildi. О́ıtkeni kásipkerler bir aýyzdan qoldaý bildirgen. Dál sol sııaqty Almaty kóshesiniń boıyndaǵy «Aısanam» jáne «Aqjaıyq» TK syrty kelbeti de kóz tartady.
