Osy rette Túrkistan oblysy Bilim basqarmasy «Oblystyq jas týrıster stansasy» memlekettik mekemesine qarasty Keles aýdandyq Bilim bólimi balalardyń jazǵy demalysyn paıdaly ótkizýine barlyq jaǵdaı jasaǵan. Aýdandaǵy jazǵy lagerlerde balalardyń ýaqtyly tamaqtanýy, oınaýy, shyǵarmashylyqpen aınalysýy, ekskýrsııaǵa shyǵýy, demalýy jan-jaqty josparlanǵan. Munda jetkinshekter bir-birimen tanysyp, til tabysyp, tez dostasady, kópshil bolýǵa, ashyq minezdi bolýǵa úırenedi. Sondaı-aq oqýshylardyń denesin shynyqtyrý, aqyl-oıyn ushtaý da – lagerdiń negizgi maqsatynyń biri.
Isker basshy Ǵalymjan Myrzanov jetekshilik etip otyrǵan aýdandyq bólimdegi pedagogter – M.Ábilov, S.Qaldarov, D.Myrzanov, A.Ahmetova óz isin súıetin, jumysyna jaýapkershilikpen qaraıtyn, bilimi men biligi toǵysqan mamandar. Osyndaı tájirıbeli muǵalimderdiń tárbıesin alǵan oqýshylar da osal emes, oblystyq jarystarda birneshe ret top jaryp, júldeli oryndarǵa ıe boldy.
«Tórt toqsan – tórt óner» atty ulttyq mádenı-aǵartýshylyq jobasynyń «Týǵan ólkem» festıvali aıasynda «Oblystyq jas týrıster stansasy» mekemesiniń dırektory S.О́mirbaevanyń elimizde ulttyq joba retinde ulttyq týrızmdi damytý, ony jańasha túrlendirip engizý boıynsha pedagogıkalyq keńestegi usynysyna sáıkes, Keles aýdandyq Bilim bóliminiń uıytqy bolýymen «Ulttyq at sportyn úıirmeshiler arasynda nasıhattaý» atty oblystyq alǵashqy kóshpeli semınar ótti. Oǵan ardager shabandoz Mustafa Adambekov, atbegi Ydyrys Kólbaev, shabandoz Tillabek Úsenov shaqyrylyp, olar at sportyndaǵy óz tájirıbelerimen bólisti. Sondaı-aq is-shara aıasynda at ábzelderi, kókparshynyń kıimi, qamshy órý sekildi ulttyq ónerdi nasıhattaıtyn kórme uıymdastyrylyp, «Kókpar tartý» oıyny kórsetildi. Kóshpeli semınarǵa Kentaý, Otyrar, Tóle bı, Saıram, Túlkibas, Qazyǵurt aýdandarynan qonaqtar keldi.
Oqýshylardyń jazǵy demalysy bastalǵannan beri 50-ge jýyq túrli is-shara uıymdastyryldy. Qosymsha bilim berý pedagogy S.Qaldarov shilde aıynda «Jas týrıster» tobyndaǵy shákirtterimen «Saryaǵash» shıpajaıyna tanymdyq ekskýrsııa jasady. Ekskýrsııa barysynda oqýshylar «Saryaǵash» shıpajaıynyń ereksheligi, sýynyń emdik qasıeti men quramyndaǵy mıneraldary, olardyń adam aǵzasyna paıdasy týraly kóptegen tyń málimetke qanyqty. Týǵan ólkeniń ózine tán osyndaı ózgesheligi úıirmeshilerdiń keýdesine tańdanys pen maqtanyshty uıalatty. Al tájirıbeli ustaz D.Myrzanov «Jas taý týrısteri» úıirmesiniń oqýshylarymen «Jaz qyzyǵy – mol demalys» josparyna sáıkes, «Kedergiler jolaǵy» atty taqyrypta jarys ótkizdi.
«Týǵan jerge týyń tik» degen sóz beker emes. Otanǵa, elge, jerge degen qurmet ózimiz ósken ólkeden bastalady. Búgingi bala – erteńgi el bolashaǵy. Oqýshylardyń jazǵy demalysyn joǵary deńgeıde uıymdastyryp, balalar tárbıesinde durys baǵyt-baǵdar berý, olardyń boıyna qorshaǵan ortany qorǵaý, tabıǵatty aıalaý, Otandy súıý, elge adal qyzmet etý syndy asyl qasıetterdi sińirý – bizdiń qasterli mindetimiz.
Jomart MEDETOV,
Keles aýdandyq
Bilim bóliminiń ádiskeri
Túrkistan oblysy
