Saltanatty is-sharanyń ashylýynda Densaýlyq saqtaý vıse-mınıstri Vıacheslav Dýdnık túlekterge Densaýlyq saqtaý mınıstri Ajar Ǵınııattyń quttyqtaýyn oqyp berdi.
– Búgingi kún – Astana medısına ýnıversıteti men stýdentterdiń, ata-analarynyń merekesi ǵana emes, búkil joǵary bilim berý júıesiniń saltanaty. Densaýlyq saqtaý salasy ult densaýlyǵy úshin óziniń kreatıvti jáne zamanaýı tásilin engize alatyn jańa jas kadrlarmen tolyqtyrylyp jatyr. Ýnıversıtettiń tabysty damýy elimizdiń adamı kapıtalynyń ósýine odan ári yqpal etetinine jáne otandyq densaýlyq saqtaýdy qazirgi zamannyń barlyq syn-tegeýrinine qarsy turý úshin álemdik deńgeıge shyǵarýǵa múmkindik beretinine senimdimin, – dep mınıstr aǵynan jarylypty.
Osydan soń Densaýlyq saqtaý birinshi vıse-mınıstri Tımýr Sultanǵazıev quttyqtaý sózinde Úkimetten densaýlyq saqtaý salasyna kórsetilip jatqan qoldaýlar týrasynda aıtyp bergen edi. Iá, vıse-mınstr aıtqandaı, medısına salasyndaǵy ulttyq baǵdarlamalar sheńberinde salanyń ınfraqurylymyn aıtarlyqtaı jańartýǵa, ambýlatorııalyq jáne stasıonarlyq emdeý-profılaktıkalyq mekemelerdi qaıta jaraqtandyrýǵa, aqparattandyrýǵa, medısına qyzmetkerleriniń jalaqysyn ósirýge múmkindik berip otyr.
Astana medısına ýnıversıtetiniń rektory Kamaljan Nadyrov ta túlekterdi quttyqtap, sát-sapar tiledi.
– Dıplom tapsyrý rásimi ýnıversıtet úshin ǵana emes, búkil el úshin mańyzdy oqıǵa dep bilemiz. Sondyqtan, túlekter, esterińizde bolsyn, dıplom – sáttiliktiń kepili emes. Jumys barysynda kún saıyn ishteı emtıhan tapsyryp, óz isterińniń naǵyz bilgir mamany ekenderińdi áli talaı dáleldeýleriń kerek. Alda mamandyqtyń qıyn synaqtary tur. Endi aq jeleń kıgen soń, ar-namystan attamaı, aqtyǵyn saqtaý mańyzdy, – dedi K.Nadyrov.
Jyldar boıy jıǵan bilimin óndiriste shyńdaýǵa bekinip otyrǵan túlekter ustazdaryna aq alǵysyn jaýdyrdy. Saltanatty rásimniń kóńil tolqytqan shaǵy – túlekter dáriger antyn qabyldaǵan sát.
Aqparat úshin aıtar bolsaq, 1964 jyldan bastap kúni búginge deıin Astana medısına ýnıversıtetinde 28 myńnan astam jas dáriger bilim alǵan. Búginde túlekterdiń aldy – elge jáne shetelge tanymal óz isiniń bilgirleri.
