«Premıým mártebesi otandyq kompanııalarǵa jahandyq aýdıtorııaǵa qoljetimdilikti ashady, olardyń halyqaralyq saýda alańynda tanymaldylyǵyn arttyrýǵa múmkindik beredi. Bir jyl ishinde kásipkerler tanymal marketpleıs arqyly ónimderdi sheteldik naryqtarǵa qalaı jyljytý kerektigin tegin úıretedi. Budan basqa, olar eksport úderisinde tolyq servıstik qyzmet pen súıemeldeýge ıe bolady», dedi «QazTrade» saýda saıasatyn damytý ortalyǵy» AQ Bas dırektorynyń orynbasary Ásel Egemberdıeva.
Irikteýdiń birinshi kezeńiniń qorytyndysy boıynsha óńdeýshi sektor ókilderinen 100-den astam elektrondyq ótinim kelip túsken. Olardyń ishinde aýyl sharýashylyǵy ónimderin, daıyn azyq-túlik taýarlaryn, mashınalar men jabdyqtardy, kólik quraldaryn, aspaptar men apparattardy, sondaı-aq hımııalyq ónimdi óndirýshiler bar. Baǵdarlamaǵa qatysýǵa taýar óndirýshiler de, saýda kompanııalary da ótinish bere alady. Premıým-shottardy tóleýden basqa kásipkerlerge tekserý rásiminen ótýge jáne saýda alańynda shaǵyn saıttar qurýǵa kómektesedi, konsýltasııalyq qoldaý kórsetedi.
Búginde halyqaralyq B2B saýda alańynda bıznestiń barlyq segmentteri usynylǵan. Suranysqa ıe taýarlar arasynda «Tamaq, sýsyndar» jáne «Aýyl sharýashylyǵy» sanattaryndaǵy ónimder jetekshi oryn alady.
Ásel Egemberdıeva atap ótkendeı, otandyq azyq-túlik taýarlary qoljetimdi baǵamen joǵary sapaly organıkalyq ónim retinde ózin kórsete aldy. Mysaly, 2020 jyldan bastap otandyq bal ónimi Alibaba marketpleısiniń halyqaralyq seriktesteri suranystarynyń basynda tur.
«Jyl saıyn bizdiń taýarlarymyz Shanhaıda ótetin álemdegi eń iri ımporttyq Ciie kórmesiniń alańynda kórsetiledi. Qytaı naryǵynda qazaqstandyq kondıterlik ónimder, kámpıtter, shokolad, makaron, kúnbaǵys maıy jáne basqalary da tanymal», dedi QazTrade ókili.
Qazir Alibaba saýda platformasynda 5 myń otandyq taýar ornalastyrylǵan. Otandyq kompanııalardyń V2V marketpleıs arqyly jalpy satylymy 2020 jyldan 2022 jylǵa deıin 300 mln dollardan asypty.
Endi alda Saýda jáne ıntegrasııa mınıstrliginiń qoldaýymen halyqaralyq Alibaba.com saýda alańyna shyǵarý jónindegi baǵdarlamaǵa qatysý úshin Qazaqstan kásiporyndary arasynda irikteýdiń ekinshi kezeńi ótkizilmek. Jańa irikteý 10 shildede bastalyp, 2023 jyldyń 23 shildesine deıin jalǵaspaq.
Esterińizge sala keteıik, QazTrade eksporttaýshylardy qoldaý sharalarynyń Biryńǵaı operatory taǵy bir qytaılyq marketpleıspen yntymaqtasady – JD.com. munda 25 qazaqstandyq brendtiń ónimderi usynyldy, mamyr aıynda taýarlardyń qanatqaqty partııasy rekordtyq merzimde satyldy.
Mundaı elektrondy platformalardyń tıimdiligin buǵan deıin Prezıdent Qasym-Jomart Toqaev ta aıtqan bolatyn:
«Qytaı álemdik lıder bolyp otyrǵan elektrondy kommersııa salasynda da ózara saýda ósimi úshin qosymsha múmkindikter bar. Alibaba Group jáne JD COM sııaqty qytaılyq ınternet-alpaýyttarda potensıal da, orasan tájirıbe de bar. Ortalyq Azııa elderiniń básekeli pozısııasyn eskere otyryp, ónimderdi alǵa qaraı ilgeriletýde Qazaqstan iri Qytaı marketpleısterin paıdalaný aýqymyn keńeıtýdi usynady. Jalpy, ózara saýda aınalymynyń ulǵaıý perspektıvasyn eskere otyryp Qazaqstan jańa keden qoımalaryn qurý jumystaryn júrgizip jatyr. Osyǵan baılanysty logıstıkalyq turǵyda qolaıly bolý úshin barlyq seriktesterimizge óz taýarlaryn bizdiń qoımalarda ornalastyrýdy usynamyz. Bul Qytaıdan Ortalyq Azııa jáne kerisinshe baǵytta tutynýshylaryna taýar jetkizý merzimin áldeqaıda qysqartady. Atalǵan jumysty «S5+Shipa» biryńǵaı elektrondyq saýda platformasyn engizýmen sınhrondaýǵa bolady», degen edi Memleket basshysy «Ortalyq Azııa – Qytaı» alǵashqy sammıtinde.
Aldaǵy ýaqytta Prezıdent usynysy tıisti kúshine enedi jáne sonyń arqasynda elder arasyndaǵy elektrondy kommersııa aınalymy qazirgiden de áleýetti bola túsedi degen senim bar.
Aıtpaqshy, Prezıdent osy sózin aıtqan sammıt qarsańynda Sıan qalasynda «Qazposhta» men qytaılyq UBI Smart Parcel (Shenzhen) Limited ókilderi kezdesip, eBay, Alibaba jáne Amazon elektrondy saýda alańdaryna otandastarymyzdyń qoljetimdiligin jeńildete túsetin tıisti memorandýmǵa qol qoıdy.
