Mehanık mamandyǵyn meńgergen jigit birneshe kólik qurastyrǵan. Onyń ishinde Toyota motory ornatylǵan BMW, avtojarysqa arnalǵan sporttyq kólikter, motosıkl bar. Máselen, Gorilla Drift Energy saıysy úshin BMW kóligin qurastyrýǵa 1,5 jyl ýaqytyn jumsaǵan. Kóńili qalaǵan kólikti arnaıy sehta, ne jóndeý ortalyǵynda emes, jeke garajynda qurastyrady.
Ol qurastyrǵan tehnıkanyń biri – «Gaz-24» markaly kóligi. El aýzynda Volga atalǵan kólik zaýyttan 1963 jyly shyǵarylǵan. Bul kólikti qaıta qurastyrý úshin 5 mıllıon teńgeden astam qarjysyn salǵan.
– Árkimniń kóńili qalaıtyn isi bolady ǵoı. Bala kezimnen tehnıkaǵa áýes boldym. Oıynshyqtardy buzyp, qaıta qurastyratyn edim. Keıin kólik qurastyramyn degen toqtamǵa keldim, – deıdi Nurjan Temirbaı.
Ol qurastyrǵan kóliktiń biri – Volga. Ony Oral qalasynan 300 myń teńgege satyp alǵan. Atyraýǵa ákelgen soń qaıta boıaǵan. Sóıtip, 60 jyl burynǵy kólikti 11 santımetrge uzartyp, kabrıolet keıpine keltirgen.
Volga kóligine «quda» túsýshiler az emes. Bul kólikti burnaǵy jyly Aqtaý qalasynda túsirilgen kınodan kórýge bolady. Tipti ánshi Erke Esmahannyń klıpinde de bar. Reseıden de shaqyrtý túsken. Retrokólikti blogerler de rolıgine paıdalanyp júr.
