Departament basshysy, aldymen, óńirde krımınogendik ahýaldyń turaqty ekendigin aıtyp ótti. Azamattardyń ómirin, densaýlyǵyn, múlkin qorǵaý sapasyn arttyryp, quqyq buzýshylyqtardyń aldyn alýdyń tıimdi júıesin qurý, polısııany qaýipsizdikti tıimdi qamtamasyz etetin uıymǵa aınaldyrý baǵytyndaǵy bastamalarǵa el nazary aýyp otyr. Osy kúni Memleket basshysynyń tapsyrmasymen «Qoǵammen seriktestikte qoǵamdyq qaýipsizdikti qamtamasyz etýdiń 2024-2028 jyldarǵa arnalǵan tujyrymdamasy» ázirlenýde. Bul mańyzdy strategııalyq qujat bıyl qabyldanady.
– Tujyrymdamadaǵy ózara is-qımyldyń algorıtminde úkimettik emes uıymdar qyzmetine basa mán berilip otyr. Daǵdarys ortalyqtarynyń jelisi keńeıtiledi. Otbasyndaǵy, turmystyq jaǵdaıdaǵy qylmystardyń kóbisi mas kúıinde jasalatyndyqtan alkogol ónimderin satý oryndaryn shekteý, oǵan qarsy jarnamany engizý boıynsha qylmystyń aldyn alý júıesi qurylady, – dedi departament bastyǵy.
Oblys kóleminde tirkelgen qylmystar sany 16 paıyzǵa tómendegen. Ásirese asa aýyr qylmystar, páter urlyǵy, mal urlyǵy, buzaqylyq, qaraqshylyq, alaıaqtyq, ınternet-alaıaqtyqtyń azaıǵany baıqalady. Kámeletke tolmaǵandar qatysatyn jáne qarý qoldaný arqyly jasalatyn qylmys ta tómendepti. Aýyr jáne asa aýyr qylmystardyń ashylý kórsetkishi jaqsarǵan.
Departament basshysy jol qaýipsizdigin jaqsartý baǵytyndaǵy sharalarǵa toqtalyp ótti.
– Bul qazir eń ózekti máselege aınalyp otyr. Mysaly, oblysta jolda júrý erejesin buzýdyń 137 myńnan asa deregi anyqtalsa, onyń 63 myńnan astamy jol apatyna tikeleı áser etetin óreskel quqyq buzýshylyqtar. Júrgizýshilerdi tártipke keltirý úshin qazirgi ýaqytta «Qorǵaý» júıesi, mobıldik jyldamdyq ólshegishteri bar avtokólikter jıi jolǵa shyǵady. «Ekin Patrol G2» jáne «Vuewo» mobıldi kesheniniń qoldanysqa engizilýi oblysta jol-kólik oqıǵalarynan qaıtys bolǵandar sanyn tómendetti. Tujyrymdamada jol ınfraqurylymynyń sapasyn da jaqsartý kózdelgen, – dedi Maqsuthan Nuǵmanuly.
Quryq bermeı, yryqqa kónbeı otyrǵan qylmys túri – ınternet alaıaqtyq. Bul qylmystyń 108 deregi tirkelip, 14-i ashylypty. Bul, árıne, tómen kórsetkish, biraq ǵalamtordyń múmkindigi keńigen saıyn aıla-sharǵysy jetile beretin alaıaqtyqtyń aldyn alý ońaı bolmaı tur. Ábden ákkilengender abonenttik nómirlerdi jıi aýystyryp, izin jasyrady. Urlanǵan aqshanyń halyqaralyq aýdarym qyzmetteri arqyly alynatyny da qylmystyń tez ashylýyna kedergi.
Sońǵy jyldary edáýir tómendegenimen de aýyldaǵy mal urlyǵymen kúres máselesi áli de ózekti. Bıylǵy «Mal urysy» jedel-profılaktıkalyq is-sharasy aıasynda 4 top ustalyp, 22 epızodty urlyq deregi ashyldy. Veterınarııa qyzmetimen birlesip, tıisti qujatsyz mal tasymaldaǵan 54 júrgizýshige shara kóterildi. Qabyldanǵan sharalar nátıjesinde mal urlyǵy 55 paıyzǵa tómendepti.
Quqyq qorǵaý salasy, onyń ishinde polısııa qyzmeti elden alshaq bolsa, qoǵam tyǵyryqqa tireledi. Sodan da olardy jaqyndatýdyń barlyq amaldary qolǵa alyndy «Elektrondyq qylmystyq is júıesi» aıasynda qylmystyq ister elektrondyq formatta tergelip, bul azamattarǵa tergep-tekserý barysyn qadaǵalaýǵa múmkindik beredi. Qoǵamdyq oryndarda, mektepterde, saýda-oıyn-saýyq ortalyqtarynda shuǵyl shaqyrý júıeleri ornatylyp jatyr.
Halyqtyń senimin arttyrý, bıýrokratııadan arylý, adamnyń suranysyna baǵyttalǵan jumys modeline kóshý baǵytyndaǵy bastamalar jaıly aıtylǵan esepte oblys turǵyndarynan túrli saýal, pikirler men usynystar kelip tústi. Olardy muqııat tyńdaǵan general-maıor arnaıy qurylǵan topqa tapsyrma berip, onyń oryndalýyn baqylaýyna alatynyn jetkizdi.
