Memleket basshysyna qorǵanys vedomstvosynyń bıylǵy birinshi jartyjyldyqta atqarǵan jumystarynyń qorytyndysy jóninde baıandaldy.
Prezıdent – Qarýly Kúshterdiń Joǵarǵy Bas qolbasshysy kezeńdik ózgeristerge negizdelgen jaýyngerlik daıarlyqtyń jańa formatyn jáne komandırlerdiń basqarý qabiletin jetildirý modelin engizý jaıynda esepti tyńdady.
Sonymen qatar Rýslan Jaqsylyqov Qasym-Jomart Toqaevqa terrıtorııalyq qorǵanysty nyǵaıtýǵa qatysty qabyldanyp jatqan sharalar týraly baıandady. Bul baǵyttaǵy jumystar zańnamalyq jáne praktıkalyq deńgeıde júrgizilip jatyr.
Prezıdentke árdaıym jaýyngerlik daıyndyqta bolatyn bólimderdi qarý-jaraqpen jáne áskerı tehnıkamen jabdyqtaý barysy, sondaı-aq otandyq óndiristiń mobıldi jáne modýldik komponentterge kóshirilýi týraly málimet berildi.
Memleket basshysyna Qarýly Kúshterdiń bitimgerlik qyzmeti týraly arnaıy baıandaldy.
Kezdesýde áskerge shaqyrylatyn jáne merzimdi qyzmetin ótegen azamattar týraly málimetterdi sıfrlyq júıege kóshirý sharalary jóninde de aıtyldy. Aqparattyq júıelerdiń jańǵyrtylyp, olardyń basqa memlekettik organdardyń derekqorlarymen biriktirilýi tirkeý, áskerı esepke qoıý jáne áskerı bıletterdi berý qyzmetterin elektrondy formatqa aýystyrýǵa múmkindik berdi.
Budan bólek, Rýslan Jaqsylyqov áskerge shaqyrylatyn azamattarǵa kredıttik demalys berý, sondaı-aq bilim alýǵa jeńildikter jasaý úshin qabyldanyp jatqan sharalar týraly aıtty. Búginde 2,5 myń sarbazdyń nesıesi keıinge shegerildi jáne áskerı qyzmetin ótegen 1,5 myń jaýyngerge joǵary oqý oryndarynda oqýǵa oryn bólindi.
Jyl basynan beri merzimdi áskerı qyzmetin ótep, zapasqa shyǵarylǵan 700-ge jýyq sarbaz júrgizýshi, mehanık, mashınıst, slesar, aspaz jáne basqa da eńbek naryǵynda suranysqa ıe mamandyqtar boıynsha bilim aldy.
Prezıdent atalǵan bastamalardy, atap aıtqanda Joǵary bilim jáne ǵylym mınıstrligimen birlesip, bilim alýǵa jeńildik beretin kvotalar bólý, merzimdi áskerı qyzmetin ótegenderge memlekettik bilim granttaryn usyný, sondaı-aq olardyń zańnamalyq turǵyda bekitilýin jalǵastyrý máselesin nazarǵa aldy.
Kezdesý sońynda Qasym-Jomart Toqaev Qarýly Kúshterdiń jaýyngerlik daıyndyǵyn kúsheıtý máselesine basa mán bere otyryp, birqatar tapsyrma berdi.
