Prezıdent Qasym-Jomart Toqaev ózara baǵalaýdyń FATF (aqshany jylystatýǵa qarsy kúrestiń qarjylyq sharalaryn ázirleý toptary) standarttaryna saı sátti ótkeni jóninde málimet berildi. Qazaqstan qylmystyq kiristerdi jylystatýǵa jáne terrorızmdi qarjylandyrýǵa qarsy is-qımyldyń meılinshe tıimdi júıesin kórsetti. Bul otandyq bıznestiń transshekaralyq qarjy operasııalar baqylaýynan ońaı ótýine múmkindik beredi.
Sondaı-aq halyqaralyq yntymaqtastyqty nyǵaıtý jumystary jalǵasyp keledi. Qazaqstan aqshany jylystatýǵa qarsy kúres jónindegi Azııa-Tynyq muhıty tobynda baqylaýshy mártebesine ıe boldy. Bul osy aımaqtaǵy eldermen qarym-qatynastyń tıimdiligin arttyrady.
Jýyrda Úkimet Kóleńkeli ekonomıkaǵa qarsy is-qımyl jónindegi 2023-2025 jyldarǵa arnalǵan keshendi jospardy bekitti. Qujatta saýda, óńdeý ónerkásibi, aýyl sharýashylyǵy, jyljymaıtyn múlik jáne kólik salalaryndaǵy kóleńkeli operasııalardyń deńgeıin tómendetý sharalary qamtylǵan.
Janat Elımanovtyń aıtýynsha, Agenttik qyzmetiniń nátıjesinde jyl basynan beri 94 mıllıard teńge shyǵyn ótelip, aktıvter qaıtaryldy, 5 qylmystyq top joıyldy (taǵy 3 is júrgizilip jatyr).
Bıýdjet qarjysyn jymqyrý faktileri boıynsha otyn-energetıka kesheninde, kommýnaldyq qyzmet kórsetý jáne gaz salasynda birqatar is tergelip jatyr.
Azamattardyń densaýlyǵyn qorǵaý maqsatynda sýrrogat alkogol óndiretin 12 sehtyń qyzmeti toqtatyldy, elimizge quny 5,3 mıllıard teńge bolatyn elektrondy temeki ákelýge jol berilmedi.
Zańsyz oıyn bıznesine qarsy is-áreketter nátıjesinde 11 jasyryn kazıno jáne 2 býkmekerlik keńse taratyldy.
Azamattardy alaıaqtyq iske tartýǵa jol bermeý úshin 22 qarjy pıramıdasynyń qyzmeti toqtatyldy, salymshylarǵa keltirilgen 1,9 mıllıard teńge shyǵyn óteldi, qarjy pıramıdalaryn jarnamalaıtyn 5,3 myńnan astam saıt pen akkaýnt buǵattaldy.
Sonymen qatar Agenttiktiń atsalysýymen 14 oblysta áleýmettik mańyzy bar azyq-túlik ónimderiniń 14 túri boıynsha baǵa arzandady.
Kezdesý sońynda Qasym-Jomart Toqaev bıznesti qorǵaýǵa, sondaı-aq shetelge zańsyz qarajat shyǵarýdyń jáne ulttyq jobalarǵa bólinetin bıýdjet qarjysyn jymqyrýdyń jolyn kesýge baǵyttalǵan birqatar tapsyrma berdi.
