Foto: QR TJM telegram arnasy
28 shildede Almaty qalasynda jáne oǵan irgeles taýly jerlerde keıde qatty jańbyr, naızaǵaı, burshaq jaýady dep boljanyp otyr. Jalpy, sońǵy 13 kúnde qalyptasqan aýa temperatýrasynyń joǵarylaýyna baılanysty Almaty taýlarynda glıasıaldy (muzdyq) jáne nóserli sıpattaǵy sel qaýpiniń joǵary dárejesi baıqalǵan. Gıdrometeorologııalyq jáne sel jaǵdaıynyń taldaýyna sáıkes, qatty jańbyr jaýǵan kezde sel qubylystary bolýy múmkin.
TJ mınıstriniń nusqaýyna sáıkes Almaty qalasynda ornalasqan qutqarý bólimsheleri joǵary daıyndyq rejımine keltirilip, al ákimniń mindetin atqarýshynyń ókimimen qalalyq azamattyq qorǵaý qyzmetteri, aýdandyq ákimdikter, azamattyq qorǵaý qyzmetteriniń avarııalyq-qutqarý, ınjenerlik tehnıkasy daıyndyqqa keltirilgen.
Qazseldenqorǵaý bólimsheleri sel qaýpi bar ýchaskelerde baqylaýdyń jedeldetilgen rejımine aýystyrylǵan, aerovızýaldy jáne jergilikti baqylaý júrgizilip jatyr, ınjenerlik-tehnıkalyq qyzmetkerlerdiń táýlik boıy kezekshiligi bekitildi.
TJD-niń málimdemesine sáıkes, týrısterge, Almaty turǵyndary men qonaqtaryna sel tasqynyna qalyp qalǵan jaǵdaıda qutqarylýǵa múmkindik joq ekeni eskertilip, sel tasqyny qaýpine baılanysty Ile-Alataý taýlaryna barmaý suralǵan.
«Taýdaǵy jaǵdaı týraly buqaralyq aqparat quraldarynyń habarlaryn únemi qadaǵalap otyryńyzdar, eger qaýip tónse nemese kenetten sel bolsa, releftiń eń bıik núktesine kóterilińizder, demalýǵa toqtamańyzdar jáne sel qaýipti kanaldardyń janynda, kól kópirlerinde (bógetterde), olardyń astynda lagerler qurmańyzdar. Esterińizde bolsyn, sel aǵynyna túsken adamdy qutqarý múmkin emes, sondyqtan oǵan jaqyndamańyzdar», delingen habarlamada.
