Jaqynda bir top oqýshy «Máńgi tiri sý» jazǵy qarqyndy kýrsynan tálim aldy. Oqýshylar qosymsha bilim jetildirip qana qoımaı, tabıǵı sýsabyndy jasap shyǵardy. Sýsabynnyń avtorlary – Arýjan Abdýlǵazıeva, Bıbinur Ǵabdyjan jáne Ýálıthan Batyrbaev.
Ǵylymǵa den qoıǵan jas órenderdiń tabıǵı óniminiń quramynda sýlfat, hlorıt sekildi hımııalyq qospalar joq. Sol sebepten oǵan Eco-way degen ataý berilgen.
«Kúndelikti tutynýǵa bolatyn ámbebap sýsabyn quramynda tabıǵı qospalar men organıkalyq zattar bar. Bizdiń sýsabyn shashty nárlendiredi, qaıyzǵaqtan tazartady. О́zimiz jasap shyǵarǵan sýsabyndy ózim qoldanyp júrmin», deıdi Ýálıthan Batyrbaev.
«Máńgi tiri sý» jazǵy qarqyndy kýrsynyń treneri Ásel Ońdashevanyń aıtýynsha, oqýshylar jasap shyǵarǵan ekosýsabyn zııandy emes. Sondyqtan ony kishkentaı balalardy jýyndyrýǵa paıdalanýǵa bolady.
«Búgingi naryqta sýsabynnyń túri kóp. Biraq sýsabyndar quramyndaǵy sýlfattar allergııa týǵyzyp, shashtyń túsýine áser etýi múmkin. Muny kópshilik eskere bermeıdi. Al atyraýlyq oqýshylar jasap shyǵarǵan sýsabynnyń quramynda sýlfat joq. Adamnyń kózin ashytpaıdy. Endi jobany áli de jetildirýdi oılastyryp otyrmyz», deıdi Ásel Ońdasheva.
