Prezıdent Qasym-Jomart Toqaev Soltústik Eýropanyń birqatar memleketinde bolǵan Qurandy órteý aktilerin qazirgi álemdegi jaǵdaıdy shıelenistirýge, halyqtar men memleketter arasyndaǵy senimge nuqsan keltirýge baǵyttalǵan arandatýshylyq áreket dep sanaıdy.
Qazaqstan – Álemdik jáne dástúrli dinder kóshbasshylarynyń sezderin ótkizýge bastamashy bolǵan memleket. Bul forým dástúrli dinder men konfessııalardyń kórnekti ókilderi arasyndaǵy tıimdi ári tabysty dıalog alańyna aınaldy.
Jýyrda Prezıdent Qasym-Jomart Toqaev álemde jıilep ketken dinı vandalızm, sonyń ishinde Quran kitabyn órteýge qatysty pikir bildirgen edi. Memleket basshysynyń pikirinshe, mundaı jaýapsyz áreketter álem memleketteri men dinderdiń beıbit qatar ómir súrýine keri áserin tıgizedi.
«Bul jalpyǵa ortaq normalarǵa qaıshy keletin aksııalar retinde biraýyzdan aıyptalýǵa tıis. BUU Bas Assambleıasy da bul máselege qatysty óz ustanymyn bildirýi kerek», delingen Qasym-Jomart Kemelulynyń pikirinde.
Osy tusta Birikken Ulttar Uıymynyń Bas Assambleıasy konfessııaaralyq dıalogty damytýǵa jáne óshpendilik tilmen kúresýge baǵyttalǵan qarardy qabyldady.
Qabyldanǵan qararda din nemese nanym-senimine baılanysty adamdarǵa qarsy zorlyq-zombylyq áreketterdiń barlyq túrleri aıyptalatyny jazylǵan. Sonymen qatar qujatta dinı rámizderge, qasıetti kitaptarǵa, turǵyn úılerge, jumys oryndaryna, múlikterge, mektepterge, mádenıet úıleri men ǵıbadat oryndaryna qarsy baǵyttalǵan kez kelgen áreketter de aıyptalatynyna nazar aýdaryldy.
Atalmysh qujat Eýropanyń birqatar elderinde Qasıetti Quran kitabyn órtep, ony qorlaý oqıǵalarynyń tizbegi aıasynda qabyldandy.
Aıta ketsek, Qazaqstan BUU-ǵa múshe basqa 47 elmen birge bul qarardyń teńavtory boldy.
