Foto: Qyzylorda oblysy ákimdigi
Ol hobbıi kásipke aınalady dep oılamaǵan. 2017 jyly tanysy bergen matadan balalarǵa arnalǵan qamzoldar tigip, ony árlep kóredi. Tiginshiniń dúnıeleri tez ótip ketedi. Sol ýaqyttan bastap turaqty tapsyrys bolsa da, hobbıin kásipke aınaldyrýǵa asyqpaı, kásibin eki jyldan keıin ǵana resmı tirkeıdi. Oǵan deıin bıznestiń qyr-syryn meńgeredi. Qyzylorda oblysynyń kásipkerler palatasy arqyly Isker áıelder keńesimen tanysyp, atalǵan keńes arqyly túrli tegin kýrstarǵa qatysyp, damıdy.
«Qazaqstannyń úzdik taýary - 2022» óńirlik kórme-baıqaýynda jeńimpaz atanǵan jas kásipker respýblıkalyq kezeńge qatysady. «Respýblıkalyq baıqaýda júlde almasam da, ózge kásipkerlermen, taýaróndirýshilermen tanystym. Sol jyly «Damý» arqyly jeńildetilgen nesıe alyp, sán úıine ǵımarat satyp aldym», deıdi ol.
Kásipkerdiń búldirshinderden bastap kez-kelgen jastaǵy adamdarǵa arnap tikken ulttyq naqyshtaǵy bomberleri búginde suranysqa ıe ónimderdiń birine aınaldy.
«Sońǵy kezde orta jastaǵy qyz-kelinshekter men er azamattar da ulttyq naqysh elementteri qosylǵan kúz-kóktemdik syrt kıimderge jıi tapsyrys bere bastady. Jalpy ulttyq naqyshty kúndelikti qoldanystaǵy kıimderge qoldaný trendke aınalyp kele jatyr. Bul tamasha tendensııa», deıdi kásipker.
Aıman Abdıevanyń endigi maqsaty - ulttyq kıimder tigetin fabrıka ashyp, kásibiniń aýqymyn keńeıtý.
