Jıynǵa qatysýshylar taýardyń Qazaqstannan shyqqanyn rastaýdyń jańa tásilderin qarastyrdy. Osylaısha jetkizýshiler túrli memlekettik qoldaý sharalaryna úmitker bola alatyn otandyq taýarlardyń biryńǵaı tizilimin qalyptastyrý jáne júrgizý usynylady. Tıisti óndiristik jáne tehnologııalyq sharttardyń, máselen, konstrýktorlyq qujattamanyń, óndiristik alańdardyń, jabdyqtardyń, bilikti mamandardyń jáne t. b. bolýyn bir ret rastaý arqyly tizilimge kirýge bolady.
Mundaı tásil taýardyń shyǵarylǵan elin aıqyndaý týraly aqyly sertıfıkattar berýdi, sondaı-aq ımporttalatyn taýarlar óndirýshilerdiń memlekettik qoldaý sharalaryn alý sharttaryn alyp tastaýǵa múmkindik beredi dep kútilýde. Sonymen qatar birqatar prosesti avtomattandyrý men sıfrlandyrý arqyly óz ónimderin basqa elderge eksporttaıtyn otandyq kompanııalarǵa túsetin júktemeniń azaıýy múmkin.
Jalpy, qazaqstandyq taýarlardyń shyǵý tegin belgileý tıimdiligin arttyrý memlekettik qoldaý sharalaryn otandyq adal óndirýshilerge baǵyttaýǵa, lokalızasııanyń damýyn yntalandyrýǵa, respýblıkadaǵy óndiristik qýattardy jańǵyrtýǵa jáne keńeıtýge, ártúrli taýarlarǵa baǵa belgileýdiń ashyqtyǵyn arttyrýǵa, t. b. múmkindik beredi.
Premer-mınıstr jańa júıeni ázirleýdi «Atameken» UKP jáne salalyq qaýymdastyqtarmen tyǵyz yntymaqtastyqta jalǵastyrý kerektigin atap ótti.
«Bızneske qatysýyn qosymsha úzindi kóshirmelermen rastaý talap etilmeýi úshin tizilimdi memlekettik organdardyń derekqorlarymen biriktirýdi qamtamasyz etý qajet. Jalpy, tizilim taýardyń shyǵý tegi týraly senimdi aqparat beretin biryńǵaı derekkózine aınalýǵa jáne adal bıznestiń múddesi úshin jumys isteýi kerek», dedi Álıhan Smaıylov.
