«Balalardyń jaǵdaıy nasharlaýy, atap aıtqanda, dene qyzýynyń kóterilýi, qusýy sııaqty belgilermen taǵy da tórt balanyń jansaqtaý bólimine túsýi, jaǵdaıdyń asqynyp ketýi qandaı da bir ýlaný jaǵdaılaryna uqsamaıtynyn kórsetti. Densaýlyq saqtaý mınıstrliginiń eń úzdik mamandary qaraǵandylyq mamandarmen birge balalardyń ómiri úshin kúresip jatyr», dedi Ajar Ǵınııat.
Búgindi tańda oblys aýrýhanasyna jetkizilgen 14 bala em qabyldap jatyr, alty bala jansaqtaý bólimine jatqyzyldy. Jansaqtaý bóliminde jatqan eki balanyń jaǵdaıy óte aýyr. Qalǵan bes balanyń jaǵdaıy jaqsy. Qazir balalarda aýrý belgileri joq.
«Qazir balalarda ish aýrý, qusý tárizdi aýrý belgileri joq. Biraq áli de dárigerlerdiń qadaǵalaýynda bolady. Aýrýhanadan soń em alyp jatqan ortalyqqa qaıta jiberiledi. Al jaǵdaıy aýyr alty balanyń densaýlyǵy boıynsha dárigerlerdiń konsılıýmy júrgizilip jatyr. Balalardyń ómirine tóngen basty qater aǵza ýlanýynan bolyp otyr», dep túsindirdi mınıstr.
Onyń aıtýynsha, bastapqy taldaýlar nátıjesi balalarda ishek ınfeksııasynyń bolmaǵanyn kórsetken. Oqıǵanyń sebebi áli de anyqtalatyn bolady.
«Qaraǵandy oblysynyń balalarǵa arnaýly áleýmettik qyzmetter kórsetý ortalyǵy» KMM-de balalardyń tamaqtan ýlaný faktisi boıynsha Qylmystyq kodekstiń 304-baby 2-bóligi (aýyr zardaptarǵa ákep soqtyrǵan sanıtarlyq erejelerdi nemese gıgıenalyq normatıvterdi buzý) boıynsha sotqa deıingi tegrep-tekserý bastaldy.
Qylmystyq is Qaraǵandy oblysy prokýratýrasynyń arnaıy prokýrorlarynyń óndirisine qabyldandy. Quqyq qorǵaý jáne arnaıy organdardyń tájirıbeli qyzmetkerleri jumyldyrylyp, vedomstvoaralyq jedel-tergeý toby quryldy. Tıisti saraptamalar taǵaıyndaldy. Tergeý sharalary aıasynda jaýapty laýazymdy tulǵalardyń is-áreketterine tıisti quqyqtyq baǵa beriletin bolady.
Esterińizge sala keteıik, Qaraǵandy oblysynyń balalarǵa arnaýly áleýmettik qyzmet kórsetý ortalyǵynda ýlaný saldarynan bir bala qaıtys boldy, taǵy altaýy jansaqtaý bóliminde jatyr.
Oblys ákimi Ermaǵanbet Bólekpaev tergeý nátıjesinde jaýapty tulǵalar anyqtalyp, qatań jazalanatynyn eskertti. Mekeme dırektorynyń mindetin atqarýshy qyzmetinen bosatyldy.
Qasymhan ǴALYM,
Qaraǵandy oblysy
