Qamysty kádege jaratýǵa bola ma? Atalǵan aýylda turatyn mektep oqýshysy Janel Shaıdolla ony qurylys salasyna paıdalanýdyń jobasyn usynyp otyr.
«Buryn qamysty turǵyn úı qabyrǵasyna qoldanǵanyn estigen edim. Sondaı úıler áli de bar. Al álemniń kóptegen elinde qamysty qurylys ındýstrııasyna keńinen paıdalaný qolǵa alyna bastady. Qamys pen sementten quıylǵan betonmen úıdiń qabyrǵasyn turǵyzýǵa, shatyryn jabýǵa qoldanýdyń ekologııalyq turǵydan tıimdiligi bar. О́ıtkeni qamys salqyn kezde úıdegi jylýdy, al ystyqta qońyr salqyn temperatýrany saqtap turady. Biraq qurylys materıalyna sapaly qamys qajet», deıdi Janel Shaıdolla.
Oqýshynyń jetekshisi Nurgúl Imamuratovanyń pikirinshe, qamystan qalyńdyǵy 20-30 sm shatyr jabyndysyn jasaýǵa bolady. Munyń birneshe sebebi bar.
«Birinshiden, qamystyń sý ótkizbeıtini dáleldengen. Ekinshiden, qamys quramynda aqýyz bolmaǵandyqtan, shybyn-shirkeı sekildi jándikter jınalmaıdy. Úshinshiden, qamystan jasalǵan shatyrdyń tózimdiligi 30 jylǵa deıin jetedi», deıdi Nurgúl Imamuratova.
