Altaı aýdany Oktıabr kentindegi №20 órt sóndirý bólimi bastyǵynyń orynbasary Elaman Nýkýshev qyzmetten bos ýaqytynda Buqtyrma sý qoımasyna demalýǵa barǵan. Bir kezde sol mańaıdan aıqaılaǵan daýystardy estigen.
«Semeı qalasynan demalýǵa kelgen 13 jasar jetkinshek basqa balalarmen sýda oınap júrgende kenetten kóterilgen tolqynnyń astynda qalyp qoıǵan. Týystary júze almaıtyndyqtan kómek surap, qatty aıqaılaı bastady. E. Nýkýshev esh oılanbastan sýǵa sekirip, batyp bara jatqan balaǵa jetip, aman alyp qaldy», delingen ShQO TJ departamentiniń aqparatynda.
Azamattyq qorǵaý organdarynda 2014 jyldan beri jumys isteıtin Elaman Nýkýshevtiń adamdy ajaldan arashalaýy alǵash ret emes. Ol 2022 jyly Oktıabrskıı aýylynda bolǵan órt kezinde egde jastaǵy áıel adamdy qutqaryp qalǵan eken.
