Mańdaıshalar men jarnama banerleriniń alynyp tastaýynyń birden bir sebebi – olardyń bári 2019 jyly bekitilgen Astana dızaın kodyna sáıkes kelmeıdi.
Nura aýdanynyń ákimdigi «Astana-Jarnama» KMM-men birlesip 9 turǵyn úı kesheninde («Qulager» TK, «Jaǵalaý-3» TK, «Qulager-2» TK, «Kórkem Tower» TK) ornalasqan ShOB sýbektileriniń tilder týraly zańnyń saqtalýy jáne zańsyz jarnamanyń (dızaın-kodqa sáıkes kelmeıtin) joıylýyn tekserip shyqty. Nátıjesinde 26-28 shilde kúnderi 91 jarnama men 30 mańdaısha demontajdaldy.
Sol sııaqty zańsyz jarnamalar men mańdaıshalardy alyp tastaý týraly 36 habarlama berilip, 3 turǵyn úı kesheninde ornalasqan («Aru Qala» TK, «Manhetten» TK, «Manhetten» TK) mańdaıshalardy dızaın kodqa sáıkestendirý boıynsha is-qımyl algorıtmi tabystaldy.
Al Saryarqa aýdanynda zańsyz ilingen 382 jarnama men mańdaısha alynyp tastaldy.
Baıqońyr aýdanynda jyl basynan beri apparat qyzmetkerleri túsindirý jáne zańsyz jarnamalardy bólshekteý boıynsha 40-tan astam kóshpeli is-shara ótkizdi. Qorytyndysy boıynsha búgingi kúni 300-ge jýyq zańsyz jarnama obektisi bólshekteldi.
Qalǵan aýdandarda da osy baǵyttaǵy jumys qarqyndy júrip jatyr. Osylaısha, bir apta ishinde ákimdik qyzmetkerleriniń jumysynyń nátıjesinde dızaın-kodqa sáıkes kelmeıtin 800-ge jýyq zańsyz ilingen bannerler men mańdaıshalar alynyp tastaldy.
Aıta keteıik, 2019 jyldyń jeltoqsan aıynda qala máslıhatymen dızaın-kod bekitilgen. Alaıda aıaqastynan pandemııa bastalyp jumys keıinge shegerilgen. Al 2023 jyldyń 4 sáýirinde Astana qalasyn damytý máseleleri jónindegi keńeste Prezıdent Q.Toqaev kóshe jarnamasyn ornalastyrýǵa qoıylatyn talaptardyń saqtalýyn baqylaýdy kúsheıtý týraly tapsyrma bergen bolatyn.
Osy baǵyttaǵy jaýapty mindet «Astana-Jarnama» kommýnaldyq memlekettik mekemesine júkteldi. Qazirgi ýaqytta ǵımarattardyń nemese qurylystardyń qasbetine mańdaıshalardy ornalastyrý tujyrymdamasy ázirlendi. Onda bıznes ókilderine elordanyń sáýlettik sánin bir stılge keltirýdiń úlgisi kórsetilgen. Ýrbanıstıka ortalyǵy men ákimdik qyzmetkerleri ár aýdannyń kásipkerlerimen kezdesý uıymdastyryp, tujyrymdamany talqylady.
