Ár aptanyń seısenbi kúnderi «Shalqar» radıosynan talantty jýrnalıst Janar Orazymbetovanyń «Daraboz» habary efırden turaqty berilip turady. Sondaı biz tyńdaǵan habardyń biri joǵaryda tilimizge tıek etken Nurǵısa Atabaıulyna arnalǵan eken.
Nuraǵańdy eske alǵanda myna bir jaıdyń oıǵa oralyp otyrǵany. О́tken ǵasyrdyń 70-jyldarynyń aıaq kezinde, qońyr kúzdiń jaımashýaq kúnderiniń birinde Ońtústiktiń shalǵaıda jatqan Sozaq aýdanyna Nuraǵańnyń basqarýyndaǵy ataqty «Otyrar sazy» orkestri gastroldik saparmen keldi. Sol kezdegi aýdanǵa qarasty 10 keńshardy túgeldeı aralap, konsert qoıǵan óner ujymy eń sońǵy kúni aýdan ortalyǵy – Sholaqqorǵan aýylyndaǵy «Myńjylqy» mádenıet saraıynda Teriskeı óńiriniń turǵyndarymen júzdesip, ónerlerin pash etti.
«El ishi – óner kenishi» degen. Kezinde «Sozaqqa barsań – kúıshimin deme» degen sóz Muqańnan (M.Áýezovti aıtady) qalǵan. Osy ólkeden shertpe kúıdiń sheberi Súgir Álıuly shyqqan. Búgin, mine, sondaı uly kúıshi, jerlesterińiz Tólegen Mombekov aǵamyz ortalaryńyzda otyr», degen Nuraǵań sahnadan túsip Tókeńniń qolyn alyp, qushaǵyna basty.
«Ulyq bolsań, kishik bol» degen. Myna kóriniske tebirenbegen adam qalmaı, 650 oryndyq zaldaǵy jurtshylyq dúrkirete qol soqty. Sol kúni Nuraǵańnyń dırıjerligimen ulttyq orkestrdiń oryndaýyndaǵy «Ata tolǵaýy», «Álqıssa», «Aqqý», t.b. kúıleri tyńdaýshylardyń qulaq quryshyn qandyryp, erekshe áserge bóledi.
Káribaı ÁMZEULY,
eńbek ardageri
Túrkistan oblysy
