Birinshi kúni balalar Bitimgerlik operasııalar ortalyǵynyń áskerı qyzmetshileri daıyndaǵan qyzyqqa toly baǵdarlamasyn tamashalaýǵa «Bitimger» oqý-jattyǵý ortalyǵyna bardy. Olarǵa áskerı tehnıka men qarý-jaraq úlgileri, sondaı-aq baılanys quraldary kórsetildi. Keıin jasóspirimder jattyǵý granatalaryn laqtyrý, atys qarýyn bólshekteý jáne qurastyrý, armııa normatıvterin oryndaý boıynsha jyldamdyq kúsh jáne sheberlik jaǵynan ózara básekege tústi. Sońynda balalarǵa pnevmatıkalyq myltyq atý múmkindigi berildi.
Kúnniń aptap ystyǵyna qaramastan, bolashaq el qorǵaýshylary jaýyngerlik daıyndyq baǵdarlamasynda qarastyrylǵan barlyq jattyǵýdy úlken qulshynyspen jáne muqııat oryndady. «Búgingi áskerı jattyǵýlarymyz keremet ótti. Endi biz is júzinde áskerı qyzmetshi bolýdyń ońaı emes ekenin bilemiz. Ákemniń jumysy qıyn, jaýapty jáne óte qyzyqty ekenin uqtym», deıdi Bitimgerlik operasııalar ortalyǵy áskerı qyzmetshisiniń uly Ilııas Tájibaev.
Belsendi ótken saıystan keıin bitimgerlerdiń balalary naǵyz sarbaz botqasynyń dámin tatyp kórdi. «Bul balalarymyzǵa ákeleriniń ne istep jatqanyn bilýge jáne kórýge tamasha múmkindik boldy», deıdi ata-analardyń biri Aıjamal Bazar. – Bitimgerlik operasııalar ortalyǵyna barǵan balalarymyz tamasha áser aldy, sizderge rızamyz».
«Jas bitimger» lageri bir aptaǵa sozylmaq. Kelesi kúnderi balalar mádenı-demalys, sporttyq is-sharalar men joryqtardy qamtıtyn qyzyqty baǵdarlamalarǵa qatysty. Sonymen birge delfınarııge, haıýanattar baǵyna, «Medeý» muz aıdynyna baryp, aspaly jolmen júrdi. Odan bólek, Qorǵanys mınıstrligi Ulttyq áskerı-patrıottyq ortalyǵynyń mýzeıine jáne «Dańq memorıaly» keshenine ekskýrsııalar josparlanǵan.
Taý daıyndyǵy ortalyǵyna barý da josparda bar, munda tájirıbeli nusqaýshylar balalarǵa taý jaǵdaıynda ómir súrý erekshelikterin aıtyp, kórsetip, olarǵa ózderin naǵyz áskerı alpınıster sııaqty sezinýge múmkindik beredi. «Bitimgerlik operasııalar ortalyǵy áskerı qyzmetshileriniń balalary úshin bul apta umytylmas áser berip qana qoımaı, fızıkalyq turǵydan shynyǵyp, shymyr bolýǵa, paıdaly bilim, praktıkalyq daǵdylar alýǵa jáne árıne, jańa dostar tabýǵa múmkindik beretinine senimdimin», deıdi ortalyqtyń aǵa ofıseri Ánýar Arynǵazıev.
