– Osy jyly «Aýyl el besigi» aıasynda 488,7 mln teńge bolatyn 12 joba bastaldy, oblystyq bıýdjetten 335,2 mln teńgelik taǵy 19 jobaǵa qarjy qaralǵan. Osylaısha, «Qyzylorda – Aıdarly – Tartoǵaı» jáne «Shymkent – Samara – Tereńózek» avtomobıl joly qaıta jóndeledi. Aýdandaǵy tozyǵy jetken elektr jelilerin jańǵyrtý da bastalyp ketti. Aıdarly, Amankeldi, Jetikól, Qoǵalykól, Shaǵan eldi mekenderiniń elektr baǵanalary men jelileri jáne transformatorlary tolyq jańartylady. Al Tereńózek kenti, Qaljan ahýn, A.Toqmaǵambetov, S.Seıfýllın eldi mekenderine jańa elektr jelilerin ornatýǵa demeýshiler kómek qolyn sozady, – deıdi aýdan ákimi Berik Sármenbaev.
Isker azamattar aýyz sý qubyryn jańartýǵa da kómek beredi. Osynyń nátıjesinde Shaǵan jáne Qoǵalykól eldi mekenderi aýyz sýmen tolyq qamtylmaq.
Bıyl aýdanda ónerkásip óndirisi 68,5 paıyzǵa ulǵaıyp, óńdeý ónerkásibi 3,4 paıyzǵa, aýyl, orman jáne balyq sharýashylyǵynyń ónimi 1,4 paıyzǵa artqan. Investısııa tartý 72,4 paıyzǵa ósipti. Jyl sońyna deıin quny 1,9 mlrd teńge bolatyn 10 ınvestısııalyq jobany júzege asyrý josparlanyp otyr. Túrli qarjy uıymdary jeńildetilgen nesıe alý úshin berilgen 49 jobanyń qujattaryn qaraýda.
Syrdarııalyqtar, ásirese «Aýyl amanaty» baǵdarlamasyna belsene qatysyp otyr. Osy kúni 3 mlrd teńgeni quraıtyn 489 jobanyń qujaty daıyndalyp, «Baıqońyr» áleýmettik kásipkerlik korporasııasy» aksıonerlik qoǵamyna usynylǵan.
Qazir aýdanda 3 247 shaǵyn jáne orta kásipkerlik sýbektisi jumys istep tur. Bıylǵy jarty jylda memlekettik jáne óńirlik baǵdarlamalar aıasynda 184 jobaǵa qarjylaı qoldaý kórsetilgen.
Syrdarııanyń negizgi tirshiligi – aýyl sharýashylyǵy. Aýdandaǵy egis kólemi jyl saıyn artyp keledi. Bıyl onyń aýmaǵy 7,8 paıyzǵa ulǵaıǵan. Aýdan dıqandary kóktemde ekken 35 myń 732 gektardyń 23 myń 500 gektary – kúrish.
– Birneshe jylǵa sozylyp kele jatqan sý tapshylyǵy agrarlyq salanyń aldyna kesekóldeneń turǵan máselege aınalǵanyn bilesizder. Osyǵan baılanysty oblys ákiminiń qoldaýymen byltyr sharýashylyqtarǵa 22 nasos alyndy. Bıyl qosymsha taǵy tórteýi ákelindi. Burynnan qolda bardy qosqanda qazir aýdanda osyndaı 32 qondyrǵymen eginge sý jetkizilip jatyr. О́tken jyldan beri oblysta aımaq basshysynyń tapsyrmasymen azyq-túlik qaýipsizdigin qamtamasyz etý úshin turǵyndarǵa baqsha daqyldaryn egýge múmkindik jasalǵany belgili. Byltyr aýdanda 210 gektar qosymsha jer ashylyp, 865 otbasy baqsha daqyldaryn ekken bolatyn. Bıyl jer kólemi 359 gektarǵa deıin ulǵaıyp, 1 105 úıelmen áleýmettik mańyzy bar kartop, kókónis, baqsha ónimderin egip aldy. Ásirese bul baǵytta jastardyń erekshe qulshynys tanytyp otyrǵanyn aıta ketkenimiz oryndy bolar. Byltyr 2 aýylda jastar brıgadasy 20 gektarǵa egin ekse, osy jyly taǵy 4 eldi mekende brıgadalar qurylyp, baqsha daqyldary egilgen alqap kólemi ulǵaıdy, – deıdi aýdan ákimi.
Syrdaǵy aýyldarǵa da tabıǵı gaz jetkizile bastaǵaly biraz boldy. Endi ot jaǵyp, kúl shyǵarýdan qutylatyn eldi mekender qataryna Syrdarııa aýdanyndaǵy Qaljan ahýn, S.Seıfýllın, A.Toqmaǵambetov, Shaǵan eldi mekenderi qosylady. Bul úshin respýblıkalyq bıýdjetten qarjy bólinip, gaz jelileri júrgiziledi.
Aýdandaǵylar demeýshilik esebinen jasalǵan N.Ilııasov aýylyn gazdandyrý jobasyna bıýdjettik ótinim usynypty, kóp uzamaı Besaryq, Aqjarma eldi mekenderin kógildir otynmen qamtý jobalary qolǵa alynbaq.
