Parlamentshiler «Aqbaýyr murajaı-arheologııalyq keshenin» aralady jáne aýyl sharýashylyǵy salasynyń ókilderimen kezdesti. Kezdesýge qatysýshylar salanyń problemalyq máselelerin, sonyń ishinde bıe sútin óndirý jáne qaıta óńdeý qunyna sýbsıdııa berý, aýyl sharýashylyǵy tehnıkasyna nesıe berýdi sýbsıdııalaý paıyzyn qaıta qaraý máselelerin talqylady.
Senatorlar sonymen qatar Shyǵys Qazaqstan oblysyndaǵy Samara aýdanynyń Samar aýylynda bolyp, aýdannyń aýyl sharýashylyǵy taýar óndirýshilerimen kezdesti, sondaı-aq «Lık» sharýa qojalyǵynyń qyzmetimen tanysty.
* * *
Parlament Senatynyń depýtaty Sáken Arýbaev Jambyl oblysyndaǵy Turar Rysqulov aýdanynda Aqtoǵan sharýa qojalyǵynyń qyzmetkerlerimen kezdesip, ózekti máselelerdi talqylady.
Is-sharada aýyl sharýashylyǵyn odan ári damytý jáne onyń keleshegin, sondaı-aq sala boıynsha qoldanystaǵy zańnamany jetildirý jaıy sóz boldy. Sáken Arýbaev Jaqsylyq aýylyndaǵy «Nur-Aı» bóbekjaı baqshasynyń qyzmetimen jáne Qulan aýylyndaǵy jańa mektep qurylysynyń qazirgi salyný barysymen de tanysty.
Depýtat Merki aýdanynda «Balaýsa» bóbekjaı baqshasynda, «Transfer» sharýa qojalyǵynda bolyp, Qaıyńdysaı aýylyndaǵy oqý orny qurylysy týraly málimetti tyńdady.
Senator, sonymen qatar Merki aýdandyq máslıhatynyń depýtattarymen de kezdesti. Júzdesý barysynda aýdannyń ózekti máseleleri, atap aıtqanda, mal jáne ósimdik sharýashylyǵyn órkendetý jaıy talqylandy.
* * *
Senat depýtaty Saǵyndyq Luqpanov Atyraý oblysynda aýdandyq máslıhat depýtattarymen, kásipkerlermen jáne Kóktoǵaı, Esbol, Jarsýat, Aq Jaıyq, Eńbekshil jáne Mahambet eldi mekenderiniń turǵyndarymen kezdesti.
Senator júzdesýler barysynda Palata qyzmetiniń qorytyndylary týraly habardar etti jáne ótken sessııa barysynda qabyldanǵan zańdardaǵy negizgi jańalyqtarǵa jan-jaqty toqtaldy. Kezdesýge qatysýshylar máslıhat depýtattarynyń óńirdegi densaýlyq saqtaý júıesin, jol jáne aýyz sýmen qamtamasyz etýdi jetildirý jónindegi usynystaryn jáne jergilikti turǵyndar aıtqan ózekti máselelerdi talqylady.
Depýtat, sonymen qatar «Ispýsınov», «Dastan» sharýa qojalyqtarynyń, «Jumaǵalıeva N» polıkarbonattan jasalǵan óndiristik jylyjaı kesheniniń jumysymen, sondaı-aq «JoiPark» oıyn-saýyq ortalyǵy jáne «Saida» saýda ortalyǵymen de tanysty.
Saǵyndyq Luqpanov sapar aıasynda aýyl turǵyndarymen júzdesti jáne shaǵyn eldi mekenderdiń problemalarymen tanysty. Atyraý oblysy aýyldarynyń problemalary únemi onyń nazarynda ekenin jáne olardy sheshý jolyndaǵy jumysty jalǵastyra beretinin atap ótti.
* * *
Parlament Senatynyń depýtaty jazǵy kanıkýl aldynda Andreı Lýkın Astana qalasy máslıhatynyń depýtattarymen jáne elorda turǵyndarymen kezdesti.
Kezdesýde máslıhat depýtattary 2023 jyldyń birinshi jartyjyldyǵynyń qorytyndysy boıynsha atqarylǵan jumystar týraly senatorǵa aıtyp berdi. Senator Andreı Lýkın óz kezeginde Senatta júrgizilip jatqan zańnamalyq jumystyń barysy týraly kezdesýge qatysýshylardy habardar etti.
«Parlament VIII shaqyrylymnyń I sessııasy barysynda jalpy alǵanda 25 zań aktisin qabyldady. Sondaı-aq VIII shaqyrylymnyń I sessııasy aıasynda «О́ńir» depýtattyq tobynyń jumysy qarqyn ala tústi jáne quramy jańartyldy. Jergilikti ókildi organdarmen ózara is-qımyl jónindegi keńes qaıta uıymdastyryldy, onyń quramyna máslıhattardyń barlyq tóraǵalary enetin boldy. Keńestiń maqsaty men mindeti de naqtylandy. Sonymen qatar 30 naýryzda Senat tóraǵasynyń jetekshilik etýimen «О́ńir» depýtattyq tobynyń jańartylǵan quramdaǵy birinshi otyrysy ótti. Onda senatorlar VIII saılanǵan Parlamenttiń I sessııasynyń ashylýy barysynda Memleket basshysy Qasym-Jomart Toqaevtyń elimiz Parlamenti men Úkimetiniń aldyna qoıǵan mindetterin talqylady», dep atap ótti Andreı Lýkın.
Senator Astana qalasyndaǵy «Esil», «Almaty», «Baıqońyr», «Saryarqa» jáne «Nura» aýdandary prokýratýralarynyń qyzmetkerlerimen de kezdesti. Olardyń qyzmetimen, materıaldyq tehnıkalyq jabdyqtalýymen, elorda aýdandaryndaǵy qadaǵalaý mekemesi men quqyqtyq tártiptiń jumysymen tanysty. Depýtat óz sózinde bıylǵy naýryz aıynan bastap parlamenttik korpýs pen Bas prokýratýranyń birlese otyryp nátıjeli jumys atqarǵanyn atap ótti.
