Kórmege sýretshiniń sońǵy jyldardaǵy ataýly keskindemelik peızajdarynan turatyn on alty jumysy qoıylǵan. Tıan-Shan taýlaryndaǵy kórikti jerdiń qarys qadamyn da nazardan qaǵys qaldyrmaı, qylqalam sheberiniń asqan mahabbatpen qamtyǵany baıqalady. Sýretshiniń qandaı ádisti qoldanǵany belgisiz, bir qyzyǵy, qaraǵan adam taýlarǵa terezeden kóz tastap turǵandaı kúı keshedi.
Tabıǵat – alýan túrli erekshelikke baı sulý jaratylys. Ásirese taýlardyń ásem kórinisi adam janyn tebirentetin qubylys. Taýlardyń alyp qoıtastary, qyrattary, bıik qarly shyńdary keskindemelik ádistersiz-aq kórkem. Sondyqtan da Bolat Ahmetovtiń gıper realıstik taýly peızajdary tabıǵattyń ózindik kórkemdigine artyq nárseniń kereksizdigin dáleldeıdi. Ol osy serııalyq jumystarynda Tıan-Shan muzdyqtary men shyńdaryn jazǵan. Beıneleý óneriniń negizgi qaǵıdasy – sulýlyqqa umtylý. Al taýlardyń eń sulý jerleri – bıik shyńdary bolsa kerek. Qysqasha aıtqanda, taý shyńyna umtylý – sulýlyqqa umtylýmen birdeı.
«Sýretshiniń týyndylarynda aldyńǵy plandaǵy belgili bir shyńnyń týra beınesi tamashalaýǵa yńǵaıly deńgeıinde oryndalyp, erekshe bulttarmen úılesim tapqan. Kókjıeksiz kók aspanmen aralasyp, ulylyq sezimin uıalatady. Týyndylarǵa bir kóz tastaǵanda, qyratty shyńnyń túster túzilimi naqty, qaıtalanbas pishinder, qatań buryshtar jáne oınańqy jaryq-kóleńkeni kórýge bolady. Mysaly, «Ozernyı shyńy» kartınasynda dál ortada sýyq aq-qońyr tústi shyńnyń basty beınesin jáne de aınalasy qalyń qarly taýlarmen jalǵasyp, joǵarǵy jaǵy aspanmen talasyp turǵandaı áser beredi. Kúnge shaǵylysqan qardyń sýyq túsin qońyr tasty shyńdarmen úılestirip jazǵan. Taýly shyńnyń aýa keńistigi úılesimdilikti saqtap turady», deıdi kórme jetekshisi Daryn Jıenbaev.
Aqıyq taýlardyń alyptyǵy, jan-jaǵymen úılesimi, artyq-kemsiz saltanaty kórgen adamdy baýramaı qoımas. Bul tek tabıǵı turǵydan ǵana emes, tulǵalyq turǵydan da taqyryptyq sıpatqa umtylystyń kórinisi. Muzdyqtardy jazýdaǵy gıperrealıstik tásildi utymdy tańdaǵan biregeı sýretshiniń dúnıeden ótkenine, mine, bıyl bir jyl toldy. Taý men shyńdy, bıiktik pen sulýlyqty ańsaýdan týǵan «Bolatty keskindeme» atty kórme qaıtalanbas biregeı qylqalam ıesin eske alýǵa arnalady.
