Alda ne kútip tur? Parıjge deıin nebári bir jyl qaldy. Osyǵan oraı Shyǵys Qazaqstan oblystyq dene shynyqtyrý jáne sport basqarmasy basshysynyń orynbasary Serik Qusymbaev aqparat quraldary ókilderimen kezdesip, atqarylyp jatqan jumystarmen Parıjdegi Olımpıadaǵa kimderdiń barýy múmkin ekeni jaıynda aıtyp berdi. «Ázirshe lısenzııa joq, biraq úmit kúttiretin sportshylarymyz jetkilikti», deıdi ol.
Onyń sózine qaraǵanda, osy jyldyń alǵashqy jartysynda óńir sportshylary sporttyń ár túrinen 3 303 medal ıelense, onyń ishinde 1 208-i altyn, 1 031-i kúmis, qalǵany qola medal eken. Jyl sońyna deıin 300 sportshy halyqaralyq týrnırlerde baqtaryn synaıdy. Al 170 sportshynyń álem jáne Azııa chempıonattaryna qatysatyny da osy jerde belgili boldy.
S.Qusymbaevtyń aıtýynsha, Fransııadaǵy jahandyq dodaǵa qatysýǵa Shyǵys óńirinen 18 úmitker lısenzııaǵa talasady. Qaıtalap aıtamyz, bul san naqty emes. Alaıda jerlesterimizdiń qazirgi nátıjeleri osylaı deýge negiz beredi. Jeńil atletıkadan Nadejda Dýbovıskaıa men Elına Mıhınaǵa, Janna Mamajanova men Galına Iаkýshevaǵa, Deızı Djepkemeı, Karolına Kıpkırýıge, Shaderak Koech pen Nora Tanýıge úlken úmit artamyz. Ataqty Olga Rypakovanyń úsh birdeı Olımpıadaǵa qatysyp, medalderdiń úsh túrin ıelenýi Shyǵys sportynyń áleýetin kórsetse kerek. Erkin kúres boıynsha Azamat Dáýletbekov pen Danııar Qaısanov dúbirli dodalardan oljaly oralyp júr. Aǵaıyndy Ernar, Ernur Fıdahmetovterden de úmit kútemiz. Eskek esý sporty túrlerinen Aleksandr Kýlıkov, Qýanysh Erǵaıypov, Margarıta Torlopova, aýyr atletıkadan Denıs Ýlanov joldama bıiginen kórinedi dep senemiz. Semserlesýden el tarıhynda tuńǵysh ret qorjynymyzǵa qola medal salǵan Rýslan Qurbanov pen Vadım Sharlaımovtyń da namysty qoldan bere qoımaıtyndary anyq.
Tokıodaǵy Olımpıadaǵa Kendi Altaıdan 10 sportshy qatysqan edi. О́kinishke qaraı, medal buıyrmady. Danııar Qaısanovtan úmit kútken edik. Alaıda ol besinshi oryndy qanaǵat tutty. Olga Rypakova shaý tartyp qalǵanyn kórsetti. Semserleýshi Rýslan Qurbanov babyna endi kelgen sekildi. Sondaı-aq legıoner Afrıkanyń jelaıaq qyzdarynyń úmitti aqtaıtyn kezi jetken syńaıly. Budan keıin jýrnalıster qoıǵan saýaldaryna tushymdy jaýap aldy.
Ońdasyn ELÝBAI,
«Qazaqstannyń qurmetti
sport qaıratkeri»
