Premer-mınıstr kópqabatty ǵımaratta bolǵan órtten 42 adam zardap shekkenin aıtyp, Úkimet atynan qaza tapqan áıeldiń týystary men jaqyndaryna kóńil aıtty.
Tótenshe jaǵdaılar mınıstri Syrym Sháriphanov 16 qabatty úıdiń kireberisindegi tútin týraly habar túskennen keıin oqıǵa ornyna dereý eki bólimshe jiberilgenin habarlady. Qaladaǵy kólik keptelisine qaramastan, alǵashqy órt sóndirýshiler oqıǵa ornyna 8 mınýtta jetti. 30 mınýt ishinde ol jerge 15 tehnıka men jeke quramnan 75 adam jınaldy.
О́rt sóndirýshiler 80 adamdy, onyń ishinde 35 adamdy arnaıy qutqarý bas kıiminiń kómegimen qutqaryp qaldy. Jalpy órt sóndirý jumystary bir jarym saǵatqa sozyldy. 4 tamyzdaǵy jaǵdaı boıynsha 5 adam medısınalyq mekemelerde stasıonarlyq em sharalaryn qabyldap jatyr.
Mınıstr órt sóndirýshiler jumysynyń birqatar faktorǵa baılanysty kúrdelene túskenin aıtty. Máselen, aýla ishine qoıylǵan avtokólikterdiń sebebinen órt sóndirý tehnıkasyna oqıǵa ornyna qaraı ótý qıynǵa soqty. Sondaı-aq balkondardaǵy shuǵyl evakýasııalaýǵa arnalǵan apattyq lıýkter jabyq bolǵan.
О́rttiń sebepterin anyqtaý úshin birqatar saraptama taǵaıyndaldy. Tergeý aıaqtalǵannan keıin tıisti prosessýaldyq sheshimder qabyldanatyn bolady.
Almaty qalasy ákiminiń orynbasary Asqar Ámrın turǵyn úıdi qalpyna keltirý jumystarynyń barysy týraly aıtyp berdi. Atap aıtqanda, kireberister men zardap shekken páterlerge jóndeý jumystary júrgiziledi. Sondaı-aq turǵyndardy ýaqytsha basqa jerge ornalastyrý (páter jaldaý) boıynsha shyǵyndardy óteý kózdelgen.
Premer-mınıstr kópqabatty úılerde órtke qarsy qaýipsizdikti qamtamasyz etý sharalaryn ózektendirip, sondaı-aq turǵyn úı ınspeksııalarynyń jumysyn jandandyrý qajettigin atap ótti.
«Tótenshe jaǵdaılar mınıstrligi ótkizilip jatqan oqý-jattyǵýlar aıasynda halyqtyń órt kezindegi is-qımyldarǵa daıyndyq deńgeıin arttyrý jóninde sharalar qabyldaýy tıis», dedi Úkimet basshysy.
Sonymen qatar Premer-mınıstr barlyq óńirde úı oramdarynyń ınfraqurylymyn daıyndaý jáne olardy abattandyrý kezinde shuǵyl qyzmetterdiń qozǵalysyn da eskerý qajettigin atap ótti, óıtkeni «Aqkent» turǵyn úı keshenindegi órt kezinde aýladaǵy avtomobılder men bıik bordıýrlar órt sóndirý tehnıkasynyń jumysyna kedergi keltirdi.
Qorytyndylaı kele, Álıhan Smaıylov turǵyndardy úılerine tezirek qaıtarý úshin qalpyna keltirý jumystaryn jedeldetýdi, órtke qarsy talaptardy saqtaý boıynsha jańa kópqabatty úılerge tekserý júrgizýdi, sondaı-aq respýblıka boıynsha TJM bólimshelerinde jyl saıyn tehnıka jańartý kezinde bıik ǵımarattarda jumys isteý úshin arnaıy tehnıka qajettiligin eskerýdi tapsyrdy.
