Sýretti túsirgen Erlan OMAR, «EQ»
Elimizdiń barlyq óńirinde dástúrge aınalǵan «Mektepke jol» respýblıkalyq qaıyrymdylyq aksııasy bastaldy. Atalǵan aksııany Oqý-aǵartý mınıstrligi 2008 jyldan beri jyl saıyn 1 tamyz ben 30 qyrkúıek aralyǵynda ótkizip keledi. Qaıyrymdylyq aksııasy az qamtylǵan jáne kópbalaly otbasylardan shyqqan, sondaı-aq asyraýshysynan aıyrylǵan erekshe bilim berýdi qajet etetin balalarǵa áleýmettik qoldaý kórsetýge baǵyttalǵan. Mınıstrliktiń málimetinshe, bıyl «Mektepke jol» aksııasy aıasynda demeýshiler men mesenattardyń kómegimen 200 myńnan astam oqýshyǵa 3 mlrd teńgeden astam qarajatqa kómek kórsetý kózdelip otyr.
«15 jyldan beri jalǵasyp kele jatqan «Mektepke jol» aksııasy muqtaj jandarǵa qoldaý kórsetýge jáne jańa oqý jyly qarsańynda barlyq balanyń merekelik atmosferasyn qurýǵa múmkindik bermek. О́tken jyly da demeýshiler men mesenattar 3 mlrd 781 mln teńge kólemindegi somaǵa 204 myńnan astam oqýshyǵa kómek kórsetken. Biz ómirlik qıyn jaǵdaıǵa tap bolǵan otbasylar men balalarǵa beıjaı qaramaıtyn, júregi keń azamattardyń atalǵan aksııaǵa belsendi qatysýǵa shaqyramyz», dedi Balalardyń quqyqtaryn qorǵaý komıtetiniń tóraǵasy Nasymjan Ospanova.
Aksııa barysynda kómekke muqtaj jandar úshin komıtette «74-25-28» jedel jeli telefony, sondaı-aq «BALA QORǴAÝ» telegram chaty jumys isteıdi.
«Otbasylar jalpyǵa bilim berý qorynan alǵan kómekten bólek, «Mektepke jol» qaıyrymdylyq aksııasy aıasynda kómek alyp keledi. Bul aksııa dástúrli qoǵamdyq qozǵalysqa aınaldy. Bıyl atalǵan is-shara 1-30 qyrkúıek aralyǵynda «Jaqsylyq jasa!» uranymen ótetin bolady. Aksııa barysynda azamattardyń ótinishterine basa nazar aýdarý úshin bilim berý uıymdaryndaǵy qoǵamdyq qabyldaý bólmelerinde úzdiksiz «jedel jeli» jumysy uıymdastyryldy. Budan bólek, iri saýda ortalyqtarynda muqtaj oqýshylarǵa gýmanıtarlyq kómek kórsetý pýnktteri ashyldy», dedi Oqý-aǵartý vıse mınıstri Edil Ospan.
Sonymen qatar elimizde muqtaj otbasylarǵa qarjylaı kómek kórsetý jáne balalardyń bilim alý quqyǵyn 100 paıyz qamtamasyz etý úshin arnaıy qurylǵan jalpyǵa birdeı bilim berý qory bar. Belgilengen tártipke saı jalpyǵa birdeı bilim berý qory aıasynda ataýly áleýmettik kómek ata-ana qamqorlyǵynan aıyrylǵan, jetim balalar men jan basyna shaqqanda tabysy eń tómengi kúnkóris deńgeıinen az jáne áleýmettik kómekke quqyly otbasylarǵa beriledi. Mınıstrlik málimetinshe, bıyl qordan oqýshylar úshin mektep formasy men oqý quraldaryn satyp alýǵa 18,7 mlrd teńge bólinedi. Al árbir bilim alýshyǵa beriletin materıaldyq kómektiń eń tómengi mólsheri – 40 567 teńge. Respýblıka boıynsha kómek kórsetýdiń eń joǵary mólsheri Pavlodar oblysynda – 47,3 myń teńge.
E.Ospannyń aıtýynsha, halyqtyń áleýmettik osal sanatyndaǵy 450 myńnan astam balaǵa qarjylaı qarjylaı kómek beriledi. О́tken jylǵy Úkimet qaýlysyna engizgen ózgeriske sáıkes ata-analar men balalar mektep formasyn, aıaqkıimdi, keńse taýarlaryn jáne jetkizýshilerdi ózderi tańdaý úshin olardyń esepshotyna qarjy aýdarylady.
«Árbir bilim alýshyǵa kıim, oqý quraldaryn satyp alýǵa arnalǵan qarajattyń eń tómengi mólsheri 40 567 teńge bolyp taǵaıyndaldy. Esterińizge sala keteıik, buǵan deıin bólingen soma 17 myńnan bastalyp, túrlishe ózgergen bolsa, bıyl barlyq óńir úshin 40,6 myń teńgeden bastap mektep jıyntyǵyn satyp alýǵa qarjy qarastyrylyp otyr. Búginde bilim basqarmasy otbasyndaǵy árbir oqýshyǵa mektep jınaqtaryn satyp alý úshin ata-anasynyń nemese olardy almastyratyn tulǵalardyń esepshotyna aqsha aýdarý ústinde. Ata-analar atalǵan taýarlardy satyp alǵannan keıin ony rastaıtyn qujatty usynýy kerek. Materıaldyq kómekti alý úshin ár ata-ana mektep dırektorynyń atyna ótinish jazýy shart. Sondaı-aq óńirlerde «Atameken» kásipkerler palatasymen birlesip, mektep jármeńkeleri uıymdastyrylady. Máselen, avtodúkenderde jeńildetilgen baǵamen mektep kıimderi men keńse taýarlary satylady. Atalǵan jumystar barlyq oblysta tamyz aıynyń sońyna deıin aıaqtalmaq», dedi E.Ospan.
