Ǵylym jáne joǵary bilim mınıstrliginiń málimetinshe, granttardy taǵaıyndaý konkýrsyna qatysý úshin 94 myń talapker qujat tapsyrǵan. Bul ótken jylmen salystyrǵanda 14 myńǵa artyq.
«Memlekettik granttar respýblıkalyq komıssııa otyrysynyń qorytyndysy boıynsha taǵaıyndaldy. Komıssııa quramynda Parlament depýtattary, múddeli memlekettik organdar, bilim salasy kásipodaqtary, ulttyq kásipkerler palatasy, Joǵary oqý oryndary qaýymdastyǵy jáne qoǵamdyq uıymdardyń ókilderi boldy», dep habarlady mınıstrliktiń baspasóz qyzmeti.
Bıyl Memleket basshysy Qasym-Jomart Toqaevtyń tapsyrmasyna sáıkes halyq tyǵyz qonystanǵan batys jáne jańadan qurylǵan óńirlerdiń jastary úshin granttar bólindi. Pedagogıkalyq, ınjenerlik, IT mamandyqtarǵa jáne jaratylystaný ǵylymdary boıynsha Atyraý oblysyna – 1500, Mańǵystaý oblysyna – 1500, Ulytaý oblysyna – 300, Jetisý oblysyna – 300, Abaı oblysyna – 500, Shymkent qalasyna – 400, Túrkistan oblysyna 500 grant berildi.
Bir granttyq orynǵa eń úlken konkýrs «Stomatologııa» bilim berý baǵdarlamalarynyń toptary boıynsha tirkelgen. Bul mamandyq boıynsha 22 talapker bir orynǵa talasty. Sondaı-aq «Halyqaralyq qatynastar jáne dıplomatııa» (bir orynǵa 14 adamnan), «Quqyq» (11 adamnan), «Mýzyka muǵalimderin daıarlaý», «Dene shynyqtyrý muǵalimderin daıarlaý» jáne «Psıhologııa» (10 adamnan) toptary boıynsha da talapkerler kóp tirkelgen.
Grantqa úmitkerler arasynda upaılar teńdigi jaǵdaıynda basym quqyqqa ıe bolatyn 20 myńǵa jýyq talapker, olardyń ishinde «Altyn belgi» ıegerleri, halyqaralyq jáne respýblıkalyq olımpıadalardyń jeńimpazdary, oqý úzdikteri bar. Sondaı-aq granttardy úılestirý barysynda áleýmettik osal sanattaǵy balalardyń kvotalary da eskerildi.
О́mirdiń aq-qarasy qatar júretini daýsyz. Túlekterdiń bir toby grantqa ıe bolyp, qýanyp jatsa, endi bir toby «grant tizimine ilikpedik» dep kúızeletini ras. Biraq munymen bári bitpegeni anyq. О́ıtkeni áli de grantty jeńip alýǵa múmkindik bar. Bul týraly Májilis depýtaty Ashat Aımaǵambetov óziniń Facebook-tegi jeke paraqshasyna jazdy.
«Birinshiden, ıgerilmegen birneshe myń grant qaıtadan úılestiriledi. Iаǵnı grant alǵan talapkerlerden keıin turǵandarǵa UBT-da jınaǵan upaı sanyna sáıkes beriledi. Sony kútýge bolady. Ekinshiden, ákimdikterdiń granttary bar. Birneshe myń grant jergilikti bıýdjetten bólinedi. Úshinshiden, «Qazaqstan halqyna» qorynyń granttary taǵy bar. Tórtinshiden, keıbir talapkerler túrli sebep boıynsha jeńip alǵan granttarynan bas tartady. Olardyń sany da az bolmaıdy. Ol granttar da qaıta taǵaıyndalady. Besinshiden, tipti eshteńe bolmasa, ýnıversıtetke aqyly túrde túsip, keıin jaqsy oqyp, GPA joǵary bolsa, bilim alý kezinde bosaǵan bos grantty utyp alýǵa bolady. Altynshydan, «gap year» arqyly bir jyl daıyndalyp, qaıtadan UBT tapsyryp, grantty jeńip alýǵa múmkindik bar. Ol meniń óz basymnan ótken oqıǵa. Bul da – jaqsy sheshim. Jetinshiden, kolledjge túsýge bolady. Kolledjde grant kóp, qajetti mamandyqtar boıynsha kolledj bitirgender naryqta tapshy. Kerek bolsa, keıin ári qaraı joǵary oqý ornyna túsip, qysqa merzimde joǵary bilim alyp shyǵýǵa da bolady. Kórip otyrǵandaryńyzdaı múmkindikter óte kóp. Bári alda. Tolyq málimet alý úshin ýnıversıtetterdiń qabyldaý komıssııasyna jolyǵý kerek», deıdi Ashat Aımaǵambetov.
Aıtpaqshy, joǵary oqý oryndaryna qujattardy tapsyrý 25 tamyzǵa deıin júzege asyrylady.
Qoǵamda grantty úılestirýge qatysty túrli pikir aıtylyp jatyr. Máselen, Narikbayev University basqarma tóraǵasynyń orynbasary Erbolat Muhamedjan osyǵan qatysty oıyn bildirdi. «94 myń oqýshy grantqa tapsyrady. Al bólingen grant sany – 73 myń. Báseke múldem joq. 1 grantqa 1,5 mektep túlegi talasqan. Osynyń saldarynan jaqsy oqıtyn da, úlgerimi nashar bala da grantqa ıe bolady. Saldarynan ýnıversıtetter túsiniksiz jaǵdaıda qalady», dedi ol.
Ras, mundaı da másele bar. Bul endi derbes maqalanyń arqaýy.
