Jarysty «Júrek ortalyǵy» qory uıymdastyrdy, ol dárigerlerge ǵylym, bilim jáne aǵartýshylyqty biriktire otyryp, júrek aýrýymen kúresýge kómektesedi. Aǵartýshylyq qyzmet aıasyndaǵy iri is-sharalardyń biri – «Sen – meniń júregimniń chempıonysyń». Is-sharany ótkizýge Astana ákimdigi qoldaý kórsetti.
Nátıjege qaramastan árbir qatysýshy – júrek chempıony, ol kardıo qyzmetin damytýǵa zor úles qosady jáne Qazaqstandaǵy transplantologııa týraly mańyzdy dıalogqa jol ashýǵa kómektesedi.
«Biz ótken jyly 500 qatysýshydan bastap, bıyl 1300-ge jetkenimizge qýanyshtymyz. Uıymdastyrýshylyq jumystardyń negizgi bóligin «Júrek ortalyǵy» qorynyń 5 adamnan turatyn shaǵyn toby oryndaıtyny úlken maqtanysh. Sondaı-aq qashyqtyqqa júgiretin adamdardy maqtan tutamyz, óıtkeni olardyń barlyǵy naǵyz qaharmandar.
Máselen olardyń qatarynda dıalızden ótken jáne búırek transplantasııasyn kútý paraǵynda júrgen jigitter bar. Bul naǵyz batyldyq pen ómirge degen súıispenshiliktiń úlgisi.
Biz úshin júgirý – bul ómirdiń bergen syıy. О́ıtkeni júgiremiz, denemiz ben rýhymyzdy nyǵaıtamyz ári eń qıyn dıagnozy bar adamdarǵa qandaı jaǵdaı bolmasyn tolyq ómir súrýge múmkindik beretin medısınany qurmetteımiz. Bul jarys Qazaqstanda donorlyqty damytý týraly óte mańyzdy jáne kúrdeli, biraq etıkalyq jáne yńǵaıly dıalog alańyna aınaldy. Bul dıalog osy alańda sátti damyp kele jatqanyna senimdimiz», dedi Qordyń kommýnıkasııalar jónindegi menedjeri Ekaterına Mostovaıa.
Esen – 10 shaqyrym qashyqtyqtaǵy jarysqa qatysýshy – kútý tizimindegi pasıentterdiń biri. Ol QR Qorǵanys mınıstrliginiń elıtalyq arnaıy jasaq bólimshesinde áskerı qyzmetshi bolǵan jáne qoıan-qoltyq urystan sport sheberi. Biraq karerasyn toqtatýyna týra keldi: «glomerýlonefrıt» dıagnozyna baılanysty ol transplantasııa jasaýy kerek. Qazir gemodıalız alyp, emdelip júr.
«Dıagnoz úkim emes. Biz ózimizdi formada ustaýymyz kerek, biz sııaqty adamdardyń qalaı ómir súretinin kórsetýimiz kerek. Men kútý tizimindegi qalǵan pasıentterdi sportpen shuǵyldanýǵa, júgirýge, ómirdi súıýge jáne aýrýǵa berilmeýge shaqyrǵym keledi», deıdi Esen.
Jarystan jınalǵan barlyq qarajat donorlyq saladaǵy mamandarǵa arnalǵan bilim berý jobalaryn, sol sııaqty qor men transplanttaýdy úılestirý jónindegi respýblıkalyq ortalyq arasyndaǵy memorandým aıasyndaǵy jobalardy iske asyrýǵa baǵyttalatyn bolady.
