Foto: Aqorda.kz
Abaı esimimen atalynatyn kósheler: Tájikstannyń basty shahary Dýshanbede, Ázerbaıjan astanasy Bakýde, Úndistannyń basty shahary Delıde, Ýkraınanyń Kıev, Kramatorsk, Dnepropetrovsk qalalarynda, Egıpet astanasy Kaırde, Germanııa astanasy Berlınde, О́zbekstannyń bas shahary Tashkentte, Qyrǵyzstan astanasy Bishkekte, Reseıdiń Altaı Respýblıkasyndaǵy Kósh-Aǵash aýylynda, Túrikmenstannyń Akdash aýylynda bar.
Esterińizde bolsa, 2022 jylǵy 26 mamyrda Bishkekte Abaı eskertkishi ashyldy. Onyń ashylý saltanatyna Qazaqstan Prezıdenti Qasym-Jomart Toqaev pen Qyrǵyzstan Prezıdenti Sadyr Japarov qatysqan.
Memleket basshysy bul kúndi qazaq pen qyrǵyzdyń rýhanı ómirindegi erekshe kún retinde baǵalap, Bishkek tórinde Abaı eskertkishiniń boı kóterýin qyrǵyz eliniń qazaq halqyna degen aıryqsha qurmetiniń belgisi dep atap ótti.
«Aǵaıyn elderdiń tamyrlastyǵyn kezinde Abaı da aıtqan. Uly aqyn qazaqtyń tarıhyna toqtalǵan kezde qyrǵyz baýyrlardy erekshe atap ótken. Ol «Esh qazaq qyrǵyz ben qazaqtyń bir tuqymdas ekenine talaspaıdy» degen. Shyn máninde, eki ulttyń tegi men tili bir, júregi men tilegi bir. Aıyr qalpaqty aǵaıynǵa bizdiń yqylasymyz qashanda erekshe. Kóp uzamaı elimizde Manas eskertkishi boı kóteredi. Bul esim qazaq arasynda óte tanymal. Áıgili Manasqa qurmetimiz erekshe. Manastaný ǵylymynyń negizin qalaǵan Shoqan Ýálıhanov ekenin eske salǵym keledi. «Manas» jyrynyń taǵdyry tartysqa túsken kezde oǵan Muhtar Áýezov arasha túskenin bilemiz», dep edi Qazaqstan Prezıdenti.
Sondaı-aq Abaı eskertkishteri Vengrııada astanasy Býdapeshtte, Qytaı astanasy Beıjińde, Fransııanyń Renn qalasynda, Belarýstiń Vıtebsk qalasynda, О́zbekstan astanasy Tashkentte, Reseı astanasy Máskeýde bar. Aqynnyń eskertkishi Máskeýdegi Qazaqstannyń Reseıdegi elshiligi mańynda ornatylǵan. Sonymen birge Abaı eskertkishi Iran astanasy Tegeranda bar, oǵan qosa, Iran ulttyq kitaphanasynda da Abaıdyń músini qoıylǵan.
1995 jyly 15 aqpanda álemniń ortalyǵy sanalatyn London qalasynda belgili prozashy Rollan Seısembaevtyń bastamasymen Abaı úıi ashyldy.
