Osy jyly otandyq ferroqorytpa óndirýshileri Qaraǵandy oblysynda ónimdiligi jylyna 400 myń tonna bolatyn arnaıy koks shyǵaratyn jańa zaýytta alǵashqy ónimdi shyǵara bastaıdy. Bul ımporttyq úlesti jylyna 57 mlrd teńgege tómendetip, sondaı-aq joǵary sapaly otyn túrine qol jetkizýge múmkindik beredi. 261 adamdy jumyspen qamtamasyz etýdi kózdeıtin jobanyń quny 43 mlrd teńgege baǵalanǵan.
Qostanaıdaǵy respýblıkalyq mashına jasaý ortalyǵy bıyl kommersııalyq júk kólikterine arnalǵan kópirlerdiń negizgi komponentterin óndirý boıynsha negizgi ónerkásip ortalyǵyna aınalmaq. Zaýyt avtomattandyrýdyń joǵary dárejesimen erekshelenip, halyqaralyq ekologııalyq standarttarǵa tolyq saı jáne jergilikti oqý oryndarymen yntymaqtastyq ornatqan. О́ndiris kezeńinde munda 300-ge deıin adam jumys isteıdi.
2023 jyly otandyq avtomobıl ónerkásibindegi taǵy bir aıtarlyqtaı jańalyq – Qostanaıda Chevrolet Enix markaly avtokólikterdiń óndirisi júzege asyrylady. Naryqta qozǵaltqyshy 90 jáne 132 at kúshine teń sedannyń 2 túri bolady. Jylyna 30 myń mashına shyǵarý kózdelip otyr. Jobany iske asyrýǵa 23,4 mlrd teńge jumsalyp, 400 jumys orny qurylady.
Buǵan qosa Saran monoqalasynda turmystyq tehnıkany, Almatyda alıýmınıı radıatorlaryn, Qaraǵandyda jel generatorlaryna arnalǵan konýstyq munaralardy, Qostanaıda Jetour, Kia jáne SsangYong markaly kólikterdi jáne Pavlodarda alıýmınıı dıskilerin óndirý josparlanǵan. Elimizde azyq-túlik qaýipsizdigin qamtamasyz etý úshin makaron ónimderi, sút jáne sút ónimderi, qus eti jáne basqa da óndiris túrleriniń aýqymy keńeıtilmek.
Tutastaı alǵanda, 2023 jyly 13,2 myń turaqty jumys ornyn qurý josparlanyp otyr.
