Salanyń negizgi kórsetkishteri týraly aýyl sharýashylyǵy vıse-mınıstri Amanǵalı Berdalın baıandady. Onyń aıtýynsha, Qazaqstandaǵy jylyjaı kólemi ótken jyldyń qorytyndysyna sáıkes 232,3 gektarǵa qysqaryp, 1,2 myń gektardy qurady. Sondaı-aq jylyjaı aýmaǵynyń qysqarýy óndirilgen ónimniń ózindik qunynyń joǵary bolýyna jáne bıznestiń tómen rentabeldiligine baılanysty.
Búginde jylyjaılardyń negizgi bóligi Túrkistan oblysynda – 824,2 ga, Almaty oblysynda – 79 ga, Qaraǵandy oblysynda – 43 ga, Shymkentte – 139,2 ga kóleminde shoǵyrlanǵan. Qazaqstannyń basqa aımaqtarynda da jylyjaıdyń salystyrmaly túrde shaǵyn alańdary bar.
Vıse-mınıstr AShM maýsymaralyq kezeńde elektr energııasy, gaz, kómir shyǵyndaryn sýbsıdııalaýdy engizý boıynsha jumys júrgizip jatqanyn atap ótti. Ol úshin 2023 jylǵy 1 mamyrdan bastap kúshine engen fermerlik jylyjaılarǵa arnalǵan ulttyq standart (QR ST 3834-2023) bekitildi.
Jıynǵa beınekonferensııa arqyly aýyl sharýashylyǵy taýaryn óndirýshilerdiń ózderi de qatysty. Túrkistan oblysyndaǵy «Agrotýr» sharýa qojalyǵynyń basshysy Tursyn Tashodjaevtyń aıtýynsha, jalpy jylyjaı máselesi sheshile bastaǵan.
«Seń qozǵaldy, jylyjaı sharýashylyqtary úshin standarttar qurý máselesi jabyldy. Kómir boıynsha aıtar bolsaq, biz «Shubarkól Kómir» AQ-men otyn jetkizý týraly shart jasasý úshin kooperatıv qurdyq. Biz ózimiz shamamen 30-35 myń tonna satyp aldyq, odan kóp alýǵa qorqamyz, óıtkeni eger kóp mólsherde saqtasaq, ol janyp ketýi múmkin. Aptap ystyq basylǵanda sharýalar janarmaı satyp ala bastaıdy. Eger sýbsıdııa bolsa, onda jylyjaı sharýashylyqtary belsendi ósim kórsete bastaıdy, sharýalar nátıjege jumys isteı bastaıdy», dedi Tursyn Tashodjaev.
Jaqyn arada ınvestısııalyq sýbsıdııalaý sheńberinde jylyjaı keshenderin salý jáne keńeıtý jónindegi jobalardy iske asyrý kezinde shyǵyndardy óteýdi 25%-dan 30%-ǵa deıin arttyrý josparlanyp otyr. Erejeniń jobasyn qyrkúıek aıynyń sońyna deıin bekitý josparlanǵan.
Budan basqa, jabyq topyraqta ósirilgen kókónis daqyldaryn óndirýdi damytý maqsatynda tyńaıtqyshtar (organıkalyq daqyldardy qospaǵanda), pestısıdter, bıoagentter men bıopreparattardyń qunyn sýbsıdııalaý, sýarmaly sý, qııar jáne qyzanaq tuqymdaryn berý arqyly memlekettik qoldaý jalǵasady.
Sondaı-aq memleket tarapynan «Agrobıznes» ámbebap nesıeleý baǵdarlamasy sheńberinde jylyjaı qurylysyna nesıe berý júzege asyrylady, bul rette sýbsıdııalaý esebinen mólsherleme 6%-ǵa deıin tómendeıdi.
