Sıfrlyq damý, ınnovasııalar jáne aeroǵarysh ónerkásibi mınıstrligi, «Qazaqtelekom» AQ jáne uıaly baılanys operatorlarynyń ókilderi elimizde uıaly baılanystyń qoljetimdiligi men sapasyna qatysty máselelerdi talqylaý barysynda osyndaı derekterdi keltirdi. Qazirgi ýaqytta baılanys operatorlarynyń jumysy qosymsha qurylǵylar ornatýǵa jáne qazirgi jabdyqtardy jańǵyrtýǵa, sondaı-aq óńirlerde uıaly baılanysty damytýǵa baǵyttalǵan.
Sıfrlyq damý, ınnovasııalar jáne aeroǵarysh ónerkásibi vıse-mınıstri Ashat Orazbektiń aıtýynsha, Astanada qosymsha qurylǵylar ornatýdy qajet etetin 600-den asa oryn bar. Onyń 39-y boıynsha másele sheshildi. Tıisti jumystar óńirlerde de júrgizilip jatyr. Budan basqa, salalyq vedomstvo ákimdiktermen, uıaly operatorlarmen birlesip jol kartasyna qol qoıady. Aldaǵy bes jylda 5G jelisi boıynsha 3 myńnan asa bazalyq stansa qurylýǵa tıis. Bul – 5G boıynsha ótkizilgen aýksıondardyń nátıjesi.
– Bıyl biz respýblıkanyń úsh qalasynda 5G jelisin quramyz. Qazirgi kezde 200-den asa bazalyq stansa Astana, Almaty, Shymkent, Túrkistan jáne taǵy basqa qalalarda qurylǵan, – dedi «Ksell» AQ basqarma tóraǵasy Ashat О́zbekov.
«Beeline Qazaqstannyń» bas atqarýshy dırektory Evgenıı Nastradın 250 jáne odan artyq halqy bar eldi mekenderdiń barlyǵynda kelesi jyldyń sońyna deıin úsh uıaly baılanys operatory bolatynyn jáne klıentter óz tańdaýyn jasaıtynyn jetkizdi. «Biz 6 oblyspen 250-den az adam turatyn eldi mekenderge mobıldi ınternetti qalaı tartýǵa bolatyny týraly jol kartasyna qol qoıdyq. Bul qıyn, árıne. Degenmen memlekettik baǵdarlamalar bizdi jaqsy yntalandyryp otyr», dedi ol.
Sonymen qatar ol byltyr kompanııa turǵyndardyń kelispeýshiligine baılanysty úıler men ǵımarattardyń shatyrlarynan 300 bazalyq stansany bólshekteýge májbúr bolǵanyn da aıtty.
«Mobaıl Telekom-Servıs (Tele2/Altel)» kompanııasy byltyr aýksıonda jeńiske jetip, 5G tehnologııasyn ornatýǵa múmkindik aldy. Birinshi kezekte bul ósip kele jatqan trafıkti tıimdi óńdeýge jol ashpaq. «Adamdarda trafıktiń sapasyna qatysty problemalar bolmas úshin jańa tehnologııalardy engizý qajet. Bul turǵyda eń áleýettisi – 5G. Búgingi tańda 5G jelilerin paıdalana alatyn klıentter sany shamamen 15 paıyzdy quraıdy. Bul kórsetkish aı saıyn ósedi», deıdi «Mobaıl Telekom-Servıs (Tele2/Altel)» bas dırektory Sergeı Konkov.
О́z kezeginde «Ksell» AQ basqarma tóraǵasy Ashat О́zbekov memleket tarapynan ruqsat berý rásimderin jeńildetý, al qoǵam tarapynan mobıldi baılanysty birinshi qajettilik quraly retinde túsinip, qabyldaý boıynsha qoldaýdyń bolǵany mańyzdy ekenin atap ótti.
Telekommýnıkasııa ındýstrııasynyń ókilderi ǵımarattardy jańa ınfraqurylymmen jabdyqtaý qalalardyń ınfraqurylymdyq kodyna aınalýǵa tıis dep sanaıdy. «Qazaqtelekom» AQ ınnovasııalar jónindegi bas dırektory Nurlan Meıirmanov kompanııanyń búginde 1 700 myń abonentke qyzmet kórsetetinin atap ótti. Onyń aıtýynsha, optıkalyq jelide 1 abonent sekýndyna shamamen 3,7 TB tutynady. Iаǵnı bir klıenttiń trafıgi aıyna 300 GB-tan asady. Eýropada bul kórsetkish shamamen 270 GB-ty, AQSh-ta 580 GB-ty quraıdy. Jalpy, elimizde tutyný normalary óte joǵary. Kompanııa jańa jelilerdi, atap aıtqanda, uıaly baılanysty damytý ústinde. «Jıilik syzyǵymen joǵary qozǵalys, ıaǵnı mıllımetrlik dıapazonǵa kóshý uıaly baılanys operatorlaryn úı-jaılarǵa kóshýge májbúr etetinin túsiný kerek. Al bul aýqymdy jumys», deıdi ol.
Onyń pikirinshe, retteýshiniń ǵana emes, basqa da memlekettik organdardyń kúsh-jigeri qajet. «Olar da atsalysyp, standarttar men normalardy qaıta qarasa durys bolady. Tıisinshe, barlyq jańa ǵımarat, qurylys jańa ınfraqurylymmen jabdyqtalýǵa tıis. Bul qalalardyń ınfraqurylymdyq kodyna aınalýy kerek», dedi N.Meıirmanov.
Vıse-mınıstr Ashat Orazbektiń aıtýynsha, vedomstvo bıznes jáne ákimshilik ǵımarattar ıeleriniń uıaly baılanys operatorlaryna kirip, jabdyqtardy ornatýǵa, sondaı-aq osyndaı ǵımarattardyń ishinde sapaly baılanysy bar symsyz jelilerdi tartýǵa múmkindik berý mindetin zańnamalyq turǵydan bekitýge bastamashylyq jasaıdy.
– Mamyr aıynda «Turǵyn úı qatynastary týraly» zańǵa túzetýler engizildi. Oǵan sáıkes bazalyq stansalardy ornatý úshin turǵyndardyń 50 paıyzy qoldaýǵa tıis. Buǵan deıin turǵyndardyń 70 paıyzynyń kelisimi qajet bolatyn. Sondaı-aq biz telekommýnıkasııalyq jabdyq ornatý týraly sheshim qabyldaýdy úıdiń keńesine tapsyrý boıynsha qosymsha túzetýler engizdik. Bular Májilistiń qaraýynda, – dedi Sıfrlyq damý, ınnovasııalar jáne aeroǵarysh ónerkásibi mınıstrligi Telekommýnıkasııa komıtetiniń tóraǵasy Erjan Meıramov.
Mınıstrlik 5G jelisin satý aýksıonynyń nátıjesinde jańa operator paıda bolýy múmkin ekenin de málimdedi. Komıtet tóraǵasynyń aıtýynsha, vedomstvonyń jalpy retteýshi retindegi basty maqsaty – básekelestik ornatý jáne ony odan ári damytý. «Osyǵan baılanysty eki máseleni aıtyp ketken jón. Birinshiden, Úkimettiń «Qazaqtelekomnyń» ishinen eki mobıldi operatordyń bireýin shyǵarý týraly naqty tapsyrmasy bar. Qazirgi tańda ınvestorlarmen jumystar jalǵasyp jatyr», dedi E.Meıramov.
Sonymen qatar jyl sońyna deıin osy 5G jelisin satý maqsatynda taǵy da aýksıon uıymdastyrý josparlanyp otyrǵanyn, eger sol jaqta basqa bir ınvestor jeńip alsa, jańa bir baılanys operatorynyń paıda bolýy ábden múmkin ekenin aıtty.
