Sybaılas jemqorlyqqa qarsy monıtorıng barysynda avtokólikterdi zańsyz tirkeý jáne júrgizýshi kýálikterin berý sharttary anyqtaldy.
Monıtorıng nátıjeleri boıynsha Sybaılas jemqorlyqqa qarsy is-qımyl agenttigi ýákiletti memlekettik organdardyń atyna 22 usynys joldady. Qazirgi tańda usynystardyń jartysynan kóbi oryndaldy.
Máselen, IIM óziniń barlyq aýmaqtyq bólimshelerinde avtokólik quraldarynyń derekqoryn túzetýge qoljetimdilikti japty.
Aıta ketsek, Ishki ister mınıstriniń buıryǵymen júrgizýshi kýálikterin berý rásimi kúsheıtildi. Onda emtıhan alýshylardyń mindetti bıometrııasy men testileýdiń barlyq prosesin beınetirkeý engizildi, oǵan qosa emtıhandardy qaıta tapsyrý reglamenti de ózgerdi.
«Pılottyq rejımde arnaıy HQKO men IIM-de jańa aqparattyq júıeler iske qosyldy. Júıede avtomobılderdiń derekterin, mindetti tólemder men alymdardy, aıyppuldardy avtomatty sıfrlyq salystyrý tetikteri kózdelgen, kez kelgen túzetýler úshin múmkindikter alynyp tastaldy. Sonymen qatar, arnaıy HQKO qyzmetkerlerin sybaılas jemqorlyq quqyq buzýshylyq sýbektilerine jatqyzý usynyldy. Zań jobasy QR Parlamentinde qaralyp jatyr», delingen ANTIKOR usynǵan aqparatta.
Arnaıy HQKO qyzmetindegi sybaılas jemqorlyq faktorlaryn joıý Antıkorrýpsııalyq qyzmettiń baqylaýynda ekenin de aıta ketken jón.
«Qabyldanyp jatqan sharalarǵa qaramastan, mamandandyrylǵan HQKO-larda qujattardy resimdeýge kómek usynatyn tulǵalar áli de bolýy múmkin. «Kómekshilerdiń» zańsyz qyzmetterine júginbeýińizdi suraımyz. Eger siz osyndaı faktilerge tap bolsańyz, onda Antıkorǵa 1424 qysqa nómiri boıynsha dereý habarlańyz», dep qosty vedomstvo ókilderi.
