Sonyń ishinde 6637 áskerı bólimniń tárbıe jáne áleýmettik-quqyqtyq jumystary bólimshesi bastyǵynyń aǵa kómekshisi Baqyt Sádýaqasov «Abaı – ult aqyny» atty baıandama jasady. Baıandamada aqynnyń ult tárbıesine qatysty danalyqty oılary týraly aıtyldy. Abaı qajymaı, talmaı eńbektenýdiń adam ómirindegi mańyzyna nazar aýdarǵan. «Saqalyn satqan káriden eńbegin satqan bala artyq» deıdi danyshpan. «Áýeli Qudaıǵa syıynyp, ekinshi óz qaıratyńa súıenip, eńbegińdi saýsań, eńbek qylsań, qara jer de beredi, qur tastamaıdy, jemisin beredi» degen Hakimniń danalyqtary jınalǵan jastarǵa oń áser etip otyrǵany baıqaldy.
Nazarbaev zııatkerlik mektebiniń qazaq tili men ádebıeti pániniń muǵalimi Asyl Ysqaqova «Abaı joly» romanyndaǵy Abaı obrazyna toqtaldy. «Tarıhı dáýir kelbeti jáne kórkemdik shyndyq» dep atalǵan baıandama búgingi kózqarastaǵy Abaı obrazyna tereńdep boılamaqqa umtylǵan. «Sosrealızmniń» qursaýymen Abaıdy óz zamanynyń ozyq oıly adamdarynan, el bılegen aqyldylardan alystatýdy oılaǵan solaqaı synshylardyń ádisterinen adalanǵan baıandamashy basqasha, jańasha oılaýǵa umtylyp, Abaıdyń óz ákesi Qunanbaıdan, eldiń atqaminer basshylary Bójeı, Súıindik, Baıdaly, Baısaldan alǵan úlgilerin, ónegelerin alyp, aqylman sózderin uqqandarynan bastap, azamat retinde qalyptasý joldaryna toqtalyp ótti. Oblys ortalyǵyndaǵy Abaı orta mektebiniń muǵalimi Perızat Moldaǵojına «Oqýǵa qushtar mektep – oqýǵa qushtar ult» jobasy aıasynda Abaı shyǵarmalaryn oqyp úıretý» degen taqyrypta baıandama jasap, danyshpannyń óleńderin taldaý, qarasózderiniń danalyq qyrlaryn ashýdyń búgingi talaptaryna toqtalyp ótti.
Jergilikti aqyndar ózderiniń Abaıǵa arnaǵan óleńderin de oqydy. Sonyń ishinde jazýshy Zeınelǵabı Imanbaevtyń qyzy Maral Ospanova óziniń «Abaıǵa taǵzym», jazýshylar odaǵynyń múshesi Kúlaıhan Rahmet «Abaı jaqqan sáýle sónbeıdi» atty óleńderin oqyp berdi. Ardager ustaz, qalalyq ardagerler uıymynyń tóraǵasy Jangeldi Tájın dombyramen Abaıdyń «Kózimniń qarasy» jáne «Segiz aıaq» ánderin shyrqady. Kúıshi Serikbaı Qusaıynov Abaı óleńderi men kúıleriniń tarıhynan áńgime shertse, Segiz seri atyndaǵy qazaq halyq aspaptary orkestriniń dombyrashysy Báıimbet Qubaıdolla aqynnyń birneshe kúıin tartyp berdi.
Sóıtip, Abaı kúni – rýhanııat merekesi retinde keńinen atalyp ótti. Oǵan qatysqan stýdentter, kýrsanttar, oqýshylar men ata-analar, ónersúıer jas-kári bir serpilip qaldy.
PETROPAVL
