Týrızm ındýstrııasy komıtetiniń búgingi málimetinshe, 2023 jyldyń alǵashqy toqsanynda elimizge kelgen sheteldik týrısterdiń sany 2,3 ese ulǵaıdy. Bıylǵy qańtar-naýryz aralyǵynda elimizge 227,7 myń sheteldik týrıst kelgen. Bul byltyrǵy sáıkes kezeńmen salystyrǵanda 130 myń adamǵa nemese 2,3 ese kóp. 2022 jyly 97 myń sheteldik qonaq kelgen. Sonymen qatyr bıyl ishki týrızmniń de kórsetkishi 20%-ǵa artypty. Iаǵnı bıyl 1 mln 348 myń adam el ishinde saıahattaǵan.
«Byltyr elimizge 1 mln-ǵa jýyq sheteldik týrıst keldi. Bıyl bul kórsetkish 1,4 mln-ǵa deıin ósedi dep josparlanyp otyr. Bul sheteldik qonaqtardyń elimizge degen qyzyǵýshylyǵynyń artyp kele jatqanyn kórsetedi. Máselen, jaz bastalǵaly elimizge kelgen sheteldikter sany 3 ese artty», deıdi Týrızm ındýstrııasy komıtetiniń tóraǵasy Dastan Ryspekov.
Týrızm – tabys kózi. Qazir álem elderi arasynda tabysynyń toqsan paıyzynan astamyn týrızmnen túsken qarajat qalyptastyratyn elder jeterlik. Máselen, ekonomıkasy týrızmge táýeldi elderdiń qatarynda Grekııa, Portýgalııa, Ispanııa, Italııa bar.
Týrızm ındýstrııasy komıtetiniń málimetinshe, bul salany damytýǵa qatysty respýblıkanyń negizgi 10 týrstansasynda ınfraqurylymdardy jańǵyrtý, servıs sapasyn arttyrý, halyqaralyq arenada elimizdiń týrıstik áleýetin ilgeriletý jáne t.b. sharalardy iske asyrý kózdelgen. Atap aıtqanda, Balqash, Qapshaǵaı, Alakól jáne Baıanaýyl kýrorttyq aımaqtaryna aparatyn avtojoldar salý jáne demalys aımaqtaryn mobıldik baılanyspen 100% qamtý, Býrabaı kýrorttyq aımaǵynda qajetti ınjenerlik jeliler júrgizý, sý qoımalarynda qosymsha sýda qutqarý stansalaryn salý, t.b. is-sharalar josparlanǵan. Sonymen qatar jańa áýe baǵyttaryn ashý, týrıstik qyzmetterdi sıfrlandyrý, qonaqúı bıznesinde jáne salanyń basqa sektorlarynda standarttardy arttyrý jóninde jumys júrgizilmek.
Atalǵan mekemeniń kózdegen mejesi 2030 jylǵa deıin barlyq sharany iske asyrýdyń nátıjesinde ishki týrısterdiń sanyn 11 mln adamǵa deıin, sheteldik týrısterdi 4 mln adamǵa deıin, salada jumyspen qamtýdy 800 myń adamǵa deıin arttyrý, sondaı-aq Dúnıejúzilik ekonomıkalyq forýmnyń reıtıngisine sáıkes týrızmdi damytý boıynsha Qazaqstandy álemniń úzdik 50 eliniń qataryna qosý bolyp otyr.
