Olga Bıbık arnaıy oqý bitirgen kásibı sýretshi emes, aýyldy aınala qorshap jatqan Araqaraǵaı ormanyndaǵy qaıyń kómirin daıyndaıtyn sehta eńbek etedi. Kómir salatyn qaǵaz qapshyq tigedi. Kúndelikti jumysy men úı sharýasynan qoly qalt etkende ǵana sýret salýǵa otyrady.
Áýesqoı sýretshiniń aıtýynsha, qaıyńnyń qabyǵy tabıǵat sýretterin salýǵa asa yńǵaıly. Qylqalam sheberi qabyqty ary-beri aýdaryp, syrtyndaǵy qońyrqaı búrtik-búdirlerge úńilip otyryp, qandaı sýret salýǵa bolatynyn birden túsinedi eken. Orman qyzynyń qolynan shyqqan kórkem týyndylardyń deni peızaj janryna arnalǵan.
Jastaıynan sýret salýǵa beıim bolyp ósken Olga mektep bitirgen soń ári qaraı oqı almaı qalǵany bolmasa, búginge deıin qolynan qylqalamyn túsirmegen. Al qaıyń qabyǵyna sýret salýmen 15 jyldan beri aınalysyp keledi. Salǵan sýretterin kóbine aǵaıyn-týystary men jaqyn tanystary keıde qıylyp surap, tegin alyp ketedi, keıde azyn-aýlaq aqshaǵa satyp alyp jatady.
– Kóńil kúıiń babynda tursa, bir-eki saǵattyń ishinde bir sýret salyp tastaýǵa bolady. Kóbine akrıldi boıaý paıdalanamyn. Sýret salyp bolǵan soń, betine tússiz lak jaǵyp shyǵamyn. Ormannyń ishinen qaıyńnyń qabyǵyn tańdap júrip izdep tabý ońaı sharýa emes. Qabyqty qaıyńnan sylyp alatyn ýaqyty bolady. Qaıyń qabyǵyn mamyrdan bastap maýsymnyń basyna deıin ǵana jınaıdy. Odan keshikseńiz qabyq aǵash dińimen bitisip ketedi, sylyp ala almaısyz. Kári aǵashtardan alýǵa bolady. Biraq mundaı qabyqtardyń tesigi kóp, sapasyz bolyp keledi. Men ózime qajet qaıyń qabyqtaryn ádette kóktemde jınap alamyn. Qysta bos ýaqytym kóbirek, sondyqtan bul mezgildi men shyǵarmashylyqqa arnaımyn, – deıdi Olga.
Sýretshi shyǵarmalarynda negizinen ormannyń tabıǵaty, jyldyń tórt mezgili beınelengen.
Qostanaı
