Jer astynda 227 adam bolǵan. Basym kópshiligi jer betine shyǵaryldy. Tórt kenshi áli tabylǵan joq. Evakýasııalanǵandardyń segizi kómirtegi totyǵymen ýlanǵan. Eki kenshiniń jaǵdaıy aýyr. Olar Qaraǵandydaǵy professor H.J.Maqajanov atyndaǵy kópbeıindi aýrýhanaǵa jetkizildi. Al qalǵanyna qoıylǵan dıagnoz: ortasha deńgeıde ýlanǵan. Olarǵa Shahtınsk qalasynda alǵashqy kómek kórsetilip, Qaraǵandydaǵy aýrýhanaǵa jetkizildi. Qazir dárigerlerdiń baqylaýynda.
– «Qazaqstan» shahtasynda zardap shekken eki adam professor H.J.Maqajanov atyndaǵy kópbeıindi aýrýhanasyna jetkizildi. Qabyldaý bóliminiń dárigerleri naýqastardyń jaǵdaıyn tekserdi. Aldyn ala dıagnoz – shahta gazdarymen jedel ıngalıasııalyq ýlaný, onyń ishinde aýyr kómirtegi totyǵymen ýlaný, toksıko-gıpoksııalyq ensefalopatııa, ýytty bronhıt. Olar reanımasııa bólimshesine jatqyzyldy, – dedi atalǵan aýrýhananyń toksıkologııa bólimshesiniń meńgerýshisi, Qaraǵandy oblysynyń bas shtattan tys toksıkologi Sáýle Smaǵulova.
О́kinishke qaraı, tórt kenshi tabylmaı jatyr. Izdestirý jumystaryna qoıý tútin kedergi keltirýde. Bul týraly «ArselorMıttalTemirtaý» taý-ken segmenti atqarýshy dırektorynyń orynbasary Sergeı Ogaı málim etti.
– Saǵat 16:40 jaǵdaı boıynsha 5 jumysshy izdestirilip jatyr. Izdeý jumystarymen dıspozısııa boıynsha shahtada ornalasqan 12 bólimsheniń 5-eýi aınalysady. Jumysshylardy izdeýge taý-ken ornyndaǵy qalyń tútin kedergi keltirip otyr. Qosymsha aqparat taǵy beriledi, – deıdi Sergeı Ogaı.
«Qazaqstan» shahtasynda bolǵan apattardyń bir parasy mynadaı: 2017 jyly 31 tamyzda tańǵy saǵat 04:21-de shahtada kenet kómir men gaz atqylaǵan. Sol ýaqytta jerdiń astynda 136 adam bolǵan. О́kinishke qaraı, úsheýi qaza tapty. 2020 jyldyń aqpan aıynda dál osy shahtada órt shyǵyp, júzden asa adam syrtqa shyǵarylǵan bolatyn. Júz metr tereńdiktegi kómir alqaby jaryǵynan metan shyǵyp, arty órtke ulasqan. Abyroı bolǵanda, kenshiler aman qalǵan edi.
Atalǵan shahta alpaýyt kompanııa «ArselorMıttal Temirtaýǵa» qaraıdy. Qarap otyrsańyz, mundaı apatty jaǵdaılar, oqys oqıǵalar jıi oryn alady. Tipti, jylda desek te jańylmaımyz. Byltyr da osy kompanııaǵa tıesili Abaıdaǵy «Lenın» shahtasynda metan jarylyp, 5 kenshi qaza bolǵan edi. Sonda kompanııanyń atqarýshy dırektory Vıdjaı Goel aldaǵy ýaqytta qaıǵyly jaǵdaı qaıtalanbas úshin kompanııanyń sharalar keshenin qabyldaıtynyn aıtqan bolatyn. Keshegi oqıǵa jarylys emes, órtten týyndap otyr. Degenmen qaýipsizdik basty baqylaýda bolýy kerek emes pe?
«Jumysty jaqsartý úshin syrttan sarapshylar tartylady. 1 mlrd dollar kólemindegi ınvestısııa endigi nátıjesin bere bastady. Bul qarajattar jumysshylarymyzdyń qaýipsizdigin, qorshaǵan ortany qorǵaýǵa jáne qural-jabdyqty jańǵyrtýǵa jumsalady», degen edi Vıdjaı Goel.
Biraq osy tusta «Arselor» antqa berik pe degen oryndy oı keledi. Qaraǵandy shahtalarynyń mundaı apatty jaǵdaıdan arylatyn kúni bar ma? Alpaýyt kompanııanyń Qaraǵandy shahtalaryna ıelik etken jyldardaǵy apatty jaǵdaı boıynsha naqty statıstıka aıtylmaıdy. Jeti qat jer astyndaǵy eńbek etip júrgen kenshilerdiń taǵdyryna kepil bola almaı otyrmyz. О́kinishti, árıne...
Qaraǵandy oblysy
