Maqsut Narikbayev University 2 doktoranty, 2 magıstranty Germanııada taǵylymdamadan ótedi. Olar Germanııadaǵy memlekettik basqarý salasyndaǵy mańyzdy isterge qatysyp, tájirıbe jınaıdy. Joba jetekshisi, zań ǵylymdarynyń doktory, professor Roman Melnıktiń aıtýynsha, mundaı múmkindik ózara tyǵyz baılanystyń arqasynda júzege asyp otyr.
– Maqsut Narikbayev University nemis seriktesterimen únemi baılanysta ári stýdentterdiń, doktoranttardyń, oqytýshylardyń bilimin jaqsartýda birlese jumys isteıdi. Bul joba da osyndaı júıeli qarym-qatynas nátıjesinde júzege asty. Germanııadaǵy seriktesterimizdiń yntymaqtastyqty jaqsartýǵa, jańa tájirıbelerdi synap kórýge árqashan ashyq ekenin atap ótkim keledi. Búginde nemis qorlary da, nemis ýnıversıtetteri de, jalpy, Germanııa bizdiń elimizdi bilim men ǵylym salasyndaǵy senimdi ári turaqty áriptesi retinde qarastyrady. Sondyqtan bastamalarymyzdy iske asyrýǵa únemi qoldaý kórsetedi, – dedi R.Melnık.
Bizdiń Germanııadan úırenerimiz kóp. О́ıtkeni ákimshilik quqyq salasyndaǵy nemis tájirıbesi zań salasyndaǵy ozyq úlgi retinde esepteledi. Mysaly, elimizde jeke tulǵalarǵa zańsyz keltirilgen zalaldy óteý týraly másele áli sheshilgen joq. Sondaı-aq jergilikti ózin-ózi basqarý ınstıtýttary áli de jetildirýdi qajet etedi. Al osy jaǵynan Germanııa óte tájirıbeli memleket.
Taǵylymdamadan ótýge múmkindik alǵandardyń biri – Ádilhan Ildebaev. Onyń aıtýynsha, bundaı taǵylymdama damyǵan Eýropa elderindegi bıýrokratııalyq úderisterdiń qalaı jumys isteıtinin qarastyrýǵa múmkindik beredi. Sonymen qatar ekinshi tarap ta bizdiń elimizdegi ákimshilik quqyqtyq jaǵdaıdyń qandaı ekenin bilýge múddeli.
– Bul taǵylymdama Germanııanyń zań salasyndaǵy kóp jyldyq tájirıbesin eskere otyryp júzege asyryldy dep aıtýǵa bolady. Onda men nemis sheneýnikteriniń ákimshilik aktilerdi qabyldaýǵa qalaı qaraıtynyn, qandaı sheshim qabyldaıtynyn, qandaı ádistermen jumys isteıtinin kórip, bilip, úırenemin. Alǵan tájirıbemdi óz elimizdegi ákimshilik quqyq salasyn damytýǵa paıdalanatyn bolamyn, – dedi Maqsut Narikbayev University stýdenti Ádilhan.
Zań ǵylymdarynyń doktory, professor Roman Melnıktiń aıtýynsha, stýdentterdiń praktıkalyq daǵdylardy ıgerýiniń eń jaqsy túri ol – taǵylymdama.
– Meniń oıymsha, eger biz ózgeristi qalasaq, memlekettik bılikti uıymdastyrýdyń barlyq zamanaýı tájirıbelerin zerttep, olardy engizý múmkindigin qarastyryp, ulttyq, tarıhı, ekonomıkalyq erekshelikterimizdi eskere otyryp júzege asyrýymyz qajet. Osy tusta máselelerdi sheshýdiń jańa tásilderin taba alatyn, ony damytyp engize alatyn jas, bilimdi, shyǵarmashyl tulǵalar qajet. Mundaı jobalar bizdiń jastarymyzǵa jańa jol ashady, olarǵa basqa eldermen baılanys ornatýǵa múmkindik beredi, – deıdi ákimshilik jáne nemis quqyǵy ǵylymı mektebiniń jetekshisi Roman Melnık.
