«Shahter» men «Oqjetpes» arasyndaǵy kezdesýde alań ıeleri kókshetaýlyqtardyń qaqpasyna jaýapsyz eki gol soqty – 2:0. 66-mınýtta Ivan Svırıdov esep ashsa, 90-mınýtta Temýr Chogadze básekeniń sońǵy núktesin qoıdy. «Kaspıı» óz alańynda «Qyzyljarǵa» ese jiberdi. 58-mınýtta Borıs Smılıanıch nysanany dál kózdese, kózdi ashyp-jumǵansha Lýka Imnadze mergendik tanytty. Aqtaýlyqtar bir ǵana golmen jaýap qaıyrýǵa jarady – 1:2. Kósh sońynda kele jatqan komandalardyń biri – «Aqsý» bul joly óte saýatty oınap, kózdegen nátıjege qol jetkizdi. «Atyraýǵa» qarsy oıynda olar tórt dopty qaqpaǵa toǵytty. Bul goldardyń avtorlary – Lıma Maılson (eki ret), Garsııa Braıan jáne Andreı Soloveı. Qonaqtar sapynan Evgenıı Kozlov qana dop soǵýǵa jarady – 4:1.
Keshe el birinshiliginiń 20 týry aıasynda taǵy tórt oıyn ótti. Bul básekelerde «Jetisý» men «Maqtaaral», «Astana» men «Qaısar», «Ordabasy» men «Qaırat» jáne «Aqtóbe» men «Tobyl» klýbtary sheberlik baıqasty.
