Memlekettik grant konkýrsynyń nátıjesi boıynsha Aqtóbede ashylatyn Heriot-Watt ýnıversıtetiniń fılıalyna 3 bilim baǵdarlamasy boıynsha 300 stýdent oqýǵa tústi. Olardyń ishinde 160 túlek kompıýter ınjenerııasy mamandyǵyna, 80 túlek elektr energetıkasy, 60 ul-qyz munaı ınjenerııasy jáne energomenedjment mamandyǵy boıynsha bilim alatyn bolady. Fılıalǵa túsýge óńirlerden barlyǵy 500-den astam túlek qyzyǵýshylyq tanytqan.
Memleket basshysy Qasym-Jomart Toqaev 2022 jyly Parlament Májilisiniń plenarlyq otyrysynda 2025 jylǵa qaraı elimizde bedeldi sheteldik ýnıversıtetterdiń keminde 5 fılıalyn ashý qajettigin, sonyń ishinde tehnıkalyq baǵyttaǵy joǵary oqý ornynyń eki fılıalyn elimizdiń batys óńirinde ashý týraly tapsyrma bergeni belgili. Osyǵan oraı Ǵylym jáne joǵary bilim mınıstrliginiń qoldaýymen Aqtóbedegi Q.Jubanov atyndaǵy ýnıversıtettiń bazasynda ulybrıtanııalyq Heriot-Watt ýnıversıtetiniń fılıalyn ashý týraly bastama kóterilip, tıisti kelisim jasaldy. Endi, mine, osy fılıal bıyl alǵashqy bilim alýshylardy qabyldaýǵa daıyn.
Shotlandııa astanasy Edınbýrgte ornalasqan Heriot-Watt zertteý ýnıversıteti ınjenerııa jáne IT mamandyǵy boıynsha álemdegi úzdik joǵary oqý oryndarynyń qataryna kiredi. 200 jyldan astam tarıhy bar bilim ordasy álemdegi alǵashqy mehanıka ınstıtýty retinde negizi qalanǵan. Ýnıversıtet Dýbaı men Malaızııada oqý korpýstaryn ashyp, halyqaralyq yntymaqtastyq baǵytyna bet burdy. 2023 jyly alǵash ret Ortalyq Azııa óńirinde – Aqtóbede jańa fılıal ashý týraly kelisimge keldi.
Atalǵan oqý ornynda bilim alýǵa grant jeńip alǵan talapkerlerdiń arasynda tek aqtóbelikter ǵana emes, Batys Qazaqstan, Mańǵystaý, Qyzylorda, Aqmola, Atyraý, Jetisý oblystarynyń, sondaı-aq Astana men Almaty qalalarynyń túlekteri de bar.
– Heriot-Watt ýnıversıtetiniń fılıalyn Aqtóbede ashý týraly bastamamyzǵa tek óńir turǵyndary ǵana emes, ózge aımaqtar men Astana, Almaty sekildi iri qalalardyń mektep túlekteri de qyzyǵýshylyq tanytty. Heriot-Watt ýnıversıtetiniń fılıalynda oqýǵa grant jeńip alǵandardyń 41,7 paıyzy kópbalaly, múmkindigi shekteýli balalardy tárbıelep otyrǵan otbasylardan shyqqan jáne ata-ana qamqorlyǵynsyz qalǵan balalar sekildi túrli áleýmettik kategorııalardy qamtıdy. Al 35 paıyzy aýyl mektepterin támamdaǵan túlekter. Memleket qoldaýyna muqtaj otbasylardan shyqqan balalardyń osy múmkindikke qol jetkizgeni erekshe qýantady, – dedi Q.Jubanov atyndaǵy Aqtóbe óńirlik ýnıversıtetiniń rektory Laýra Qarabasova.
Stýdentter alǵashqy jyly deńgeıine qaraı topqa bólinip, ózge pándermen qatar ıntensıvti túrde akademııalyq aǵylshyn tilin meńgeredi. Jubanov ýnıversıtetiniń basshylyǵy stýdentterge qosymsha psıhologııalyq qoldaý men baǵyt-baǵdar beretin mentorlar qyzmeti iske qosylatyny, sondaı-aq 300 stýdentke arnap jataqhanadan oryn beriletinin málimdedi.
Heriot-Watt ýnıversıtetiniń ókili mundaı áriptestik Qazaqstan úshin ǵana emes, shotlandııalyq oqý orny úshin de paıdaly bolatynyna senimdi. «Bul qadam rasynda transformasııaǵa bastap, eki oqý ornyna da ózgerister ákeletinine senimdimin. Biz Dýbaıda, Malaızııada ashylǵan kampýstarymyzdan úırengenimiz kóp boldy. Onda júrgizilgen jumys bilim berý júıemizge, ǵylymı zertteýlerge, tipti, Edınbýrgte ornalasqan kampýske áser etti. Bul yntymaqtastyq bizge ǵana emes, Jubanov ýnıversıtetine de paıdaly bolady dep senemin. Stýdentter óńirdiń, tipti Qazaqstannyń ulttyq ekonomıkasyna oń yqpal etetin mansap jolyna qajetti daıyndyqty bere alatyn oqý baǵdarlamasyna kóńili tolady dep oılaımyn», deıdi Heriot-Watt University halyqaralyq yntymaqtastyq bóliminiń dırektory Djared Fılıppı.
