MEMLEKETTIK MÁNI ZOR MÁSELELER

Áleýmettik keńes otbasylardy qoldaýǵa baǵyttalǵan   saıasat jaıyn talqylady “Nur Otan” halyqtyq-demokratııalyq partııasynyń fraksııasy janyndaǵy Áleý­mettik keńes pen Parlament Májilisiniń Áleýmettik-mádenı damý komıteti birlesip, elde qalyptasqan demografııalyq úrdisterdi, turǵyndardyń reprodýktıvti densaýlyǵy men reprodýktıvti ustanymdaryn, týýdy kóbeıtý maqsatynda otbasylardy qoldaýǵa baǵyt­talǵan memlekettik saıasatty talqylaǵan otyrys ótkizdi. Onyń jumysyna Parlament depýtattary, ortalyq jáne jergilikti atqarýshy organ­dardyń, qoǵamdyq uıymdardyń, halyqaralyq jáne úkimettik emes uıymdardyń ókilderi qatysty, dep habarlady Májilistiń baspasóz qyzmeti. Otyrysty Áleýmettik keńes­tiń tóraıymy Aıtkúl Samaqova betashar sózben bastap, “Nur Otan” HDP hat­shysy Sergeı  Gromov alǵysóz sóıledi. Eńbek jáne halyqty áleý­mettik qorǵaý mınıstri, Qazaq­stan Respýblıkasy Prezıden­tiniń janyndaǵy Áıelder isi jáne otbasylyq-demogra­fııalyq saıasat jónindegi ulttyq komıssııa tóraıymy Gúlshara Ábdiqalyqova “Eldegi demog­rafııalyq ózgerister turǵy­synda otbasylardy qoldaý jónindegi sharalardy jetildirý týraly” degen taqyrypta baıan­dama jasady. “Ordaǵa kerek otaýǵa da kerek” dep halyq danalyǵymen bastaǵan mınıstr  halyqtyń ál-aýqatyn, ana, bala, otbasyn áleýmettik qorǵaý júıesin joǵarylatý, bilim berý, densaýlyq saqtaý salalaryn qajetti qarajatpen qamtamasyz etý, aılyqtardy, zeınetaqy­lardy kóbeıtý, arnaıy memle­kettik járdemaqyny joǵary­latý otbasy jáne balaǵa baıla­nysty memleketimizdiń saıasaty­nyń basty máselesi ekenin atap ótti. Eldegi demografııalyq ózgeristerge tómendegi jaǵdaı­lar ústeme bolýda: birinshiden, dástúrli qazaqstandyq qoǵamda áıelder sany áli de erkekterden basymdyq tanytyp tur. Gen­derlik teńsizdik saldarynan erlerdiń ólimi kóbeıip barady. Búgingi otyz jastaǵy on aza­mat­tyń tórteýi alpysqa tolmaı qaıtys bolyp ketip jatyr. (38,7%). Sonyń ke­si­ri­nen je­sir­ler men jetim balalar kóbeıýde. Sodan otbasyna kiris kemip, balalarǵa bilim alýǵa múmkindik azaıyp, tipti jumys­syzdyqtyń ósýine alyp kelýde. Ekinshiden, halyqta ólim-jitim áli de bar­shylyq. Onyń basty sebebi – júrek-qan tamyrlary aýrý­lary, jaraqat alý men ýlanyp qalý, t.b. bolyp tur. Ekologııalyq hal-ahýal da halyqqa keri áserin tıgizýde. Úshinshiden, azamattyq nekeden týǵan nekesiz balalar kóbeıe túsýde. Bıylǵy jylǵy El­basynyń Qazaqstan halqyna Joldaýynda da ár adamnyń, árbir otbasynyń, búkil halyq­tyń ál-aýqatyn odan ári kóterýge baǵyttalǵan ıgi ister belgilengen. Son­dyq­tan da otyrysta talqylanyp jatqan másele oryndy jáne ol elimizde atqarylyp jatqan ıgi isterge óz yqpalyn tıgizedi  dep senim bildirdi mınıstr. Elbasymyz bıylǵy Jol­daýynda: “Alda turǵan onjyl­dyqtyń asa mańyzdy mindeti – Qazaqstannyń barlyq azamat­tarynyń ómir sapasy men deńgeıin jaqsartý, áleýmettik turaqtylyq pen qorǵalýdy nyǵaıtý. El halqy sanynyń 2020 jyly 10%-ǵa ósýi úshin memleket barlyq qajetti jaǵ­daılardy jasaıtyn bolady”,  dep atap kórsetilgen bolatyn.  Olaı bolsa, Qazaqstan damýyn­daǵy basym baǵyttyń biri – qoǵamdaǵy otbasylyq saıasattyń damýy, árbir adam úshin otbasy mahabbattyń sar­qylmas qaınar kózi, bir-birin qoldaý, otbasyn­daǵy salamat­tylyq, ózara túsinistik pen adaldyq”, – dedi óz sózinde Májilistiń Áleý­mettik-mádenı damý komıtetiniń tóraıymy Dınar Nóketaeva.  Otbasy — qoǵamnyń negizgi uıasy, ol – kishigirim memleket. Sondyqtan, memleket otbasyna erekshe qamqorlyqpen qaraıdy, múmkindiginshe oǵan kómek kórsetedi, kimniń de bolsyn otbasynyń ishki máselelerine zańsyz aralasýyna jol bermeıdi. Sonymen qatar, basqosýda basqa sóz alǵandar Qazaqstan Respýblıkasyndaǵy otbasy týraly zańnamany jetildirý, erkekter men áıelderdiń repro­dýktıvti densaýlyǵyn jaqsartý, ekonomıkalyq qamtamasyz etý, otbasylyq qundylyqtar men dástúrler jáne olardy qazirgi zamanǵy ómirge engizý, otbasy­ny qoldaý men demografııalyq problemalardy sheshýdiń ha­lyqaralyq tájirıbesi, sondaı-aq “Ákeler men balalar” zert­teýiniń nátıjeleri: ákelerdiń otbasyndaǵy balalar tárbıesine áseri  jáne t.b. máselelerge toqtaldy. Otyrystyń qorytyndysy boıynsha otbasylardyń jaǵ­daıyn, olardyń mártebesin nyǵaıtý, el Prezıdentiniń halyq sanyn kóbeıtý týraly júktegen mindetine sáıkes de­mografııalyq ahýaldy jaqsartý maqsatyndaǵy usynystar qabyldanady.