Eki jas sanatynda saıysqa túsken erler men áıelder 10,1 jáne 5 shaqyrym qashyqtyqqa júgirip, ózara kim myqtyny anyqtady. Eresekter arasynda 10,1 shaqyrym qashyqtyq bekerge tańdalyp otyrǵan joq. Ol dańqty batyrdyń 101 jyldyǵyna oraılastyrylyp tańdalǵan.
Is-shara «Atamnyń amanaty» qoǵamdyq birlestiginiń bastamasymen Qorǵanys mınıstrligi, Ulttyq ulan jáne elorda ákimdiginiń qoldaýymen uıymdastyryldy. Is-sharaǵa 700-den astam adam qatysty. Saıyskerler qatarynda Aqmola garnızonynyń, Shekara qyzmetiniń, Ulttyq ulannyń áskerı qyzmetshileri, Qarýly kúshterdiń ardagerleri, kásibı sportshylar men sportsúıer qaýym bar ekenin aıta keteıik.
Jarys bastalmas buryn Áýe qorǵanysy kúshteriniń bas qolbasshysy, avıasııa general-maıory Dáýren Qosanov sóz sóılep, jarysqa qatysýshylarǵa sáttilik tiledi.
– Avıasııa general-maıory Talǵat Bıgeldınov – keıingi urpaqqa úlgi bolar eren tulǵa. Bizdiń kýrsanttar 22 jasynda tek ınstıtýtty aıaqtap jatady, al ol osy jasta Keńes Odaǵynyń Batyry atandy. Maıdanda 300-den asa kókke kóterilip, jaýdyń 7 ushaǵyn atyp túsirdi. Onyń ómiri – batyldyqtyń, tabandylyqtyń jáne Otanǵa janqııarlyqpen qyzmet etýdiń úlgisi, – dep atap ótti D.Qosanov.
Jarys aldynda Qorǵanys mınıstrligi, Qarýly kúshter, Shekara qyzmeti men Ulttyq ulannyń qurylymdyq bólimsheleriniń atynan qatysqan áskerı qyzmetshiler júgirdi. 18-49 jas aralyǵyndaǵy erler ishinen 10,1 shaqyrym qashyqtyqqa júgirgen Álimjan Baltabek birinshi, Damır Ábdirahmanov ekinshi, Sultan Bazarbaev úshinshi oryndy ıelendi. Osy jas sanatyndaǵy áıelder arasynda Janna Áljanova úzdik dep tanylsa, Alısa Kraft jáne Alena Aqymbekova úshtikke ilindi.
50 jastan asqan erler arasynda Rınat Salıkjanov birinshi oryn alsa, Lorens Rossov ekinshi, Arsan Júzenov úshinshi oryndy qanjyǵalaryna baılady. 50 jastan asqan áıelder arasynda Sonıa Veksteın jeńimpaz atandy.
18-49 jas aralyǵyndaǵy erler synynda 5 shaqyrym qashyqtyqqa júgirgen Dáýlet Sádýaqasov máre syzyǵyn birinshi bolyp kesti. Odan keıin Arhat Qaldybek, úshinshi bolyp Beıbit Ahmýrov márege jetti. Osyndaı sanattaǵy áıelder arasynda Dına Jákenova jeńiske jetse, ekinshi orynǵa Mádına Berqalıeva, al úshinshi orynǵa Lýnara Bekeeva taban tiredi.
Elý jastan asqan erler arasynda Eleýsiz Pardabaı jeńiske jetti. Ekinshi oryndy Sáken Gýbashev, úshinshi oryndy Abaı Tasbolatov ıelendi. 50-den asqan áıelder arasynda Gúlmıra Turlyhanova jeńis tuǵyrynan kórindi.
Jarystyń barlyq qatysýshysyna mılıtarı úlgisindegi fýtbolkalar men aty ańyzǵa aınalǵan ushqysh basqarǵan shabýyldaýshy ushaq túrindegi medaldar tapsyryldy.
