– Shetelde bilim alý bala kúngi armanym edi. Soǵan jetý úshin til úırenemin dep maqsat qoıdym. Qazirgi tańda túrik, aǵylshyn tilderinde erkin sóıleımin. Aǵylshyn tilin birinshi kýrstan úırene bastadym. Eki jyl ýaqyt ishinde bilim deńgeıimdi birshama arttyrdym, – deıdi ol.
Qaraqat – Qazaq ulttyq qyzdar pedagogıkalyq ýnıversıtetiniń fızıka páni muǵalimi mamandyǵynyń 3-kýrs stýdenti. Aqtóbe oblysy, Alǵa qalasyndaǵy Alǵa mektep-gımnazııasynyń túlegi. «Altyn belgi» ıegeri.
– Ýnıversıtetimizde bilimdi shetelde jalǵastyrýǵa arnalǵan túrli baǵdarlama bar. Akademııalyq utqyrlyq, qos dıplom taǵy da basqa jobalar stýdentterge kóp múmkindik syılap otyr. Bul baǵdarlamalar 4 jyl ishinde eki ýnıversıtetten qatar bilim alyp, eki dıplom alýǵa múmkindik beredi. Men qos dıplom baǵdarlamasymen Mıssısıpı alqaby ýnıversıtetine Science Education mamandyǵyn oqýǵa baramyn, – deıdi ol.
Qaraqat AQSh-ta úırengen tálimin elimizde kádege jaratqysy keledi.
– Dál osyndaı múmkindik syılaǵan Qazaq ulttyq qyzdar pedagogıkalyq ýnıversıtetine, oqytýshylarǵa alǵysym sheksiz. Kez kelgen jaǵdaıda qoldaıtyn ata-anama, baýyrlaryma, dostaryma rahmet aıtamyn. Oqýymdy úzdik aıaqtap, ustazdyq joldyń qyr-syryn tolyq meńgerip, sol arqyly elimniń damýyna úles qosqym keledi, – deıdi Qaraqat.
Saltanat BAITEKENOVA,
H.Dosmuhamedov atyndaǵy
Atyraý ýnıversıtetiniń stýdenti
