Aýyl jáne ınternet

Olar mektep jasyndaǵy balalarǵa arnalǵan Smart-ortalyqtyń jumysymen tanysyp, basqa da nysandardy aralady. «Iýbıleınyı» shaǵyn aýdanynda salynyp jatqan Smart-ortalyq osy óńirdiń jol kartasyna engizilgen. Ol 600-den astam oqýshyǵa arnalǵan. Munda robottehnıka jáne baǵdarlamalaý kabınetterin, kıbersport zaly, landshafty dızaın stýdııasy jáne basqa da baǵyttar boıynsha zerthanalar ashý josparlanǵan.

«Ortalyq tek bilim alatyn oryn emes, balalardyń jeke áleýetin ashýǵa, qabiletterin damytýǵa, talanttaryn anyqtaýǵa arnalǵan alań. Qostanaıda mundaı nysannyń salynyp jatqany jáne onyń jaqyn arada iske qosylatyny qýantady», dedi E.Ábil.

Smart-ortalyqtyń jalpy aýdany 12 myń sharshy metr­den asady. Onyń aınalasy balalarǵa, jastarǵa arnalǵan sport alańdarymen, jasyl jelekpen, úsh sýburqaqpen abattandyrylady.

Sonymen qatar májilismender Tele2/Altel uıaly baılanys operatorlarynyń 5G jańa býynynyń bazalyq baılanys stansasyna bardy. Oblystyq aqparattandyrý basqarmasynyń basshysy Azamat Qashıev depýtattardy jaqynda iske qosylǵan jańa baılanys munarasymen tanys­tyrdy. Endi qalada Tele2 jáne Altel uıaly baılanys paıdalanýshylary úshin 5G qoljetimdi.

Budan keıin Qostanaı oblysyndaǵy aýyldardy baılanyspen qamtamasyz etý máseleleri boıynsha kezdesý ótti. Jıynǵa Májilis jáne oblystyq máslıhat depýtattary, aqparattandyrý basqarmasynyń ókilderi, sondaı-aq uıaly baılanys operatorlary qatysty.

«Halyqty sapaly baılanyspen qamtamasyz etý – mańyzdy másele. Áriptesterimizben oblystyń aýdandary men aýyldaryn aralaımyz, halyqpen kezdesemiz. Sonda jıi qoıy­la­tyn suraq­tar­dyń biri – shalǵaı eldi mekenderdi ınternet jáne turaq­ty baı­lanyspen qamtamasyz etý. Qazir bul baǵyt­ta belsendi ju­mys at­qarylyp jatyr. 2025 jylǵa deıin biz oblys­tyń barlyq aýylyn ınternetpen jáne baılanyspen qam­ta­ma­syz etýdi jos­par­lap otyrmyz. Buǵan ótken shaqyrylymda de­pý­­tat­­tar qa­byl­daǵan zańnamalyq túzetýler yqpal etedi», dedi E.Smyshlıaeva.