Oral qalasynda kún saıyn 300-ge jýyq qoǵamdyq kólik kóshege shyǵady. Byltyr 79 avtobýs jańadan satyp alynsa, bıyl 50 kólik jańartylady eken. Qala ákimdigi oblys ortalyǵynda jolaýshy tasymalymen aınalysatyn mekemelerden jyl saıyn avtoparktiń keminde 10 paıyzyn jańartyp turýdy talap etedi. Oral qalasynyń ákimi Mırjan Satqanov «Osy jospar oryndalsa, 5 jyl ishinde tozyǵy jetken kóne kólikten qutylamyz» dep otyr.
«Búginde Oral qalasyndaǵy avtobýs parkteriniń tozyǵy 35 paıyzǵa jetken. Eń qıyny – qarajat máselesi. Kásipkerler ekinshi deńgeıli bankterge kepil qoıyp, nesıe alady. Byltyrdan beri bıýdjetten bólinetin sýbsıdııanyń mólsherin kóbeıttik. Jyl saıyn bul salaǵa oblystyq bıýdjetten 3,3 mlrd teńge bólinip kelse, aldaǵy úsh jyl boıy jalpy 15 mlrd teńge berilmek. Turǵyndarǵa qolaıly bolýy úshin barlyq jaǵdaıdy jasaýymyz kerek. Árıne, eń aldymen, sapaly jol salǵanymyz jón. Bıyl qalada 50-den astam aıaldama salynyp jatyr. Sebebi shahardaǵy 150-ge tarta orynda eshqandaı aıaldama joq. Avtobýs júrgizýshileriniń ortasha jalaqysy – shamamen 310 000 myń teńge. Ashyǵyn aıtý kerek, qazir kólik júrgizýshileri tapshy. Al tájirıbesiz mamandardy jumysqa alý qaýipti», deıdi Mırjan Munaıdaruly.
«Oralavtotrans» JShS jelige qosyp otyrǵan sý jańa «Yutong» jáne «Vektor NEXT» markili avtobýstar – jolaýshylarǵa yńǵaıly, zamanaýı úlgide jasaqtalǵan kólik. «Yutong»-tiń 8 baqylaý kamerasy, kondısıoneri, múgedekter arbasyn kóterip-túsiretin qondyrǵysy bar. Bul kólikterdiń baǵasy shamamen 80 mln jáne 40 mln teńge turady eken. Barlyq avtobýs qalalyq ákimdik bólgen sýbsıdııaǵa jáne ekinshi deńgeıli bankterdiń nesıesine alynǵan.
Batys Qazaqstan oblysy
