Kóp uzamaı «Rosavıasııa» bul aqparatty rastady. Bıznes-djet jolaýshylarynyń qatarynda Evgenıı Prıgojın esimdi azamat bolǵan kórinedi. Sonymen qatar qaza tapqandar qatarynda Dmıtrıı Ýtkın esimdi jolaýshy da bar eken. Buqaralyq aqparat quraldarynyń jazýynsha, ol – «Vagner» komandıri. Áli kúnge deıin E.Prıgojınniń ólimi resmı rastalǵan joq. Degenmen Reseı prezıdenti Vladımır Pýtın apattan qaza tapqandardyń týystary men jaqyndaryna kóńil aıtyp úlgerdi. «Alǵashqy derekter ushaqta «Vagner» kompanııasynyń qyzmetkerleri bolǵanyn kórsetedi», dedi Kreml basshysy.
Apatqa ushyraǵan «Embraer Legacy 600» ushaǵy, shyn máninde, E.Prıgojınge tıesili. Transponder sıgnaldary arqyly temirqanatty kólikterdiń ushýyn baqylaıtyn «Flightradar24» qyzmeti RA-02795 tirkeý nómiri bar «Embraer Legacy 600» reısin bolǵanyn rastaıdy. Ol Máskeý ýaqytymen 17.59-dan 18.11-ge deıin ushqan. Derekterge súıensek, ushaq transponderdi áýede qosqan. Sol kezde áýe kemesi Máskeý túbindegi Zelenograd qalasynyń mańynda 3,7 shaqyrym bıiktikte, saǵatyna 585 shaqyrym jyldamdyqpen bıiktikke kóterilip bara jatqan. Al Shernevo aýylynyń mańynda transponder sıgnal berýdi toqtatqan kórinedi. Ushaq Kýjenkıno aýyly mańynda qulaǵan. Eki eldi mekenniń arasy jarty kılometrge jýyq.
Ázirge apatqa ne sebep bolǵany naqty aıtylǵan joq. Biraq buqaralyq aqparat quraldary birqatar teorııa jasap úlgerdi. Sonyń ishindegi eń tanymaly – áýe kemesiniń bortynda bomba qoıylýy múmkin ne ony áýe qorǵanys quraldary atyp qulatýy yqtımal. Apattan keıin keshke RBK agenttigi quqyq qorǵaý organdaryndaǵy derekkózge silteme jasap, tergeýshiler ushqysh qatesi, tehnıkalyq aqaý jáne syrtqy yqpal sekildi nusqalardy qarastyryp jatqanyn habarlady.
Ádette, ár avıasııalyq oqıǵadan keıin tergeýshiler birneshe nusqany tekseredi. Bul – standartty úrdis. Negizinen áýe kemesi ekıpajdyń nemese tehnıkalyq personaldyń qateliginen, jabdyqtyń durys jumys istemeýinen, syrtqy sebepten apatqa ushyraıdy.
Áleýmettik jelilerde taraǵan vıdeolarǵa súıensek, ushaq qulap bara jatqanda odan tútin shyǵyp jatqany kórinedi. Oǵan qosa, temir qustyń qaldyǵy birneshe shaqyrymǵa shashylǵan. Munyń bári túrli qastandyq jasaldy deýshilerdiń kúdigin qalyńdata tústi. Degenmen tergeý amaldary aıaqtalmaıynsha naqty kesip-piship aıtý qıyn.
Keń taraǵan nusqanyń, ásirese «Vagner» kompanııasyna tıesili telegram kanaldar jıi keltiretin sebeptiń biri – ushaq bortyndaǵy jarylys. Buǵan dálel retinde olar áýe kemesiniń aspanda qulap kele jatqanda-aq birneshe bólikke bólingenin alǵa tartady. «Baza» arnasy derekkózderge silteme jasaı otyryp, bomba ushaqtyń ájethanasyna qoıylýy múmkin dep habarlady.
«Financial Times» gazetiniń habarlaýynsha, ushaqty áýe qorǵanys quraldary atyp túsirgen. Biraq jasyryn derekkózge súıengenimen, basylym buǵan naqty dálel keltirmeıdi. Sondaı-aq osyndaı pikirdi ustanatyn «Vagner» kompanııasyna jaqyn telegram kanaldar bar. Bul nusqa da negizsiz emes. Birinshiden, áýe kemesi qulap kele jatqan vıdeoda ushaqtyń mańynan sozyla jalǵasqan aq tútin baıqalady. Bul – raketadan qalǵan bolýy yqtımal.
Ekinshiden, kýágerler keminde eki jarylysty estigenin aıtady. Oǵan qosa, fotolarda qulaǵan ushaqtyń fıýzelıajynan birneshe kishigirim tesikter kórinedi. Iаǵnı raketa tıgen degen pikirge senetinder muny da alǵa tartady. Biraq bul nusqanyń da kemshiligi jeterlik. «Embraer Legacy 600» radardan óshken kezde shamamen 8,5 shaqyrym bıikte ushyp bara jatqan. Ony atyp qulatý úshin óte qýatty áýe qorǵanys kesheni kerek. Qarapaıym zenıttik qurylǵymen mundaı qashyqtaǵy ushaqty atyp qulatý qıyn. Al «Býk» sekildi keshenderdiń raketasy óte úlken. Alda-jalda áýe kemesin «Býkpen» atyp qulatsa, onda fıýzelıajda úlken tesikter qalýǵa tıis.
Budan bólek, birneshe nusqa da buqaralyq aqparat quraldary betinde talqylandy. Olardyń qatarynda ushaqtaǵy tehnıkalyq aqaý, pılottyń qateligi, tabıǵı apat sekildi sebepter bar. Alaıda «Embraer» kompanııasy óte bedeldi, al qulaǵan «Legacy 600» bıznes-djeti óte qaýipsiz temir qustyń qatarynda. Buǵan deıin osy sanattaǵy áýe kemesi bir-aq márte apatqa ushyraǵan. Onyń ózinde, pılottyń qateliginen ekinshi ushaqpen soǵysqan.
Apattan keıin álemdik medıa resýrstar jańalyqty jarysa jazdy. Ásirese kópshiligi osydan eki aı burynǵy qarýly kóterilisti mysalǵa keltiredi. Máselen, «Daily Star» tabloıdy «Prıgojınniń ólimi eshkimdi tańǵaldyrmaıdy» dep jazdy. «Daily Express» basylymy «Tańǵalarlyǵy joq. Sodyrlardyń basshysy jáne Pýtınniń qarsylasy ushaq apatynan qaza tapty» dep habarlady. Al «Daily Mirror» oqıǵany «Pýtınniń kek alýy» dep sıpattady. Dál osyndaı taqyryppen «The Sun» gazeti de maqala jarııalady.
Esterińizde bolsa, osydan eki aı buryn «Vagner» tobynyń jetekshisi Evgenıı Prıgojın kóterilis uıymdastyryp, Rostov qalasynyń ákimshilik ǵımarattaryn basyp alyp, Máskeýge bettegen. El astanasyna júzdegen shaqyrym qalǵanda aýyr tehnıkalardan quralǵan kolonna toqtap, Kreml basshysy V.Pýtınmen kelissóz júrgizdi. Nátıjesinde, E.Prıgojın raıynan qaıtyp, Belarýske ketti.
