Keńeste bilim berýdi sıfrlandyrý, aqparattyq-kommýnıkatıvtik tehnologııalar, elektrondy oqýlyqtar, kópmádenıetti ortany qalyptastyrý, dástúrler men ınnovasııalardy sıntezdeý jaıynda sóz qozǵaldy.
– Memleket basshysy Qasym-Jomart Toqaevtyń saılaýaldy baǵdarlamasyndaǵy tapsyrmasyna oraı, oqý quraldaryn sıfrlyq formatqa kóshirip, bilim berýdiń ınnovasııalyq joldaryn qarastyrý mindetteldi. Bul – óte mańyzdy qadam. Ol bilim berý sapasyn jaqsartýǵa baǵyttalǵan. Osy rette qala men aýyldaǵy orta bilim alshaqtyǵyn qysqartý maqsaty tur. Sonymen birge pedagogterdiń sıfrlyq bilimdi oqý barysynda qoldaný úshin biliktilikterin arttyrý kózdelip otyr. Ol birinshi kezekte balalardyń zeıinin ashý, bilimge degen qushtarlyǵyn oıatý úshin qajet. Osylaısha, elimizde adam kapıtaly damıdy. Sondaı-aq tapsyrma boıynsha balabaqshalarǵa biryńǵaı kezek platformasyn engizý josparda bar. Sonyń kómegimen ashyqtyq paıda bolyp, jemqorlyqtyń joly kesiledi. Ári ata-ana aldynda tórt balabaqshany óz yńǵaıyna qaraı tańdaýǵa múmkindik týady. Kezek sany, jaǵdaıy men bos orny bar balabaqshalardyń tizimi jasaqtalady. Budan bólek, oqýshylardy oqý quraldaryna qol jetkizý, mektepke kirý jáne ashanadan tólem jasaý úshin biryńǵaı kartamen qamtamasyz etý jumystary jalǵasyp jatyr. Muny barlyq mektepke engizý qajet. Mundaı tájirıbe qazirdiń ózinde Astanada bar. Shymkent shaharynda da sátti júzege asyp keledi. Bul óz kezeginde balalar tamaǵyna bólinetin bıýdjet qarjysyn únemdeýge, ata-analarǵa ul-qyzdarynyń qaı jerde júrgeninen habardar bolyp otyrýǵa kómektesedi. Osy bastamalardyń barlyǵy jergilikti atqarýshy organdarmen jáne platforma jasaýshy kompanııalarmen birlesip iske asyrylyp jatyr, – dedi Aıbat Ilııasov.
Mınıstrlik ókiliniń aıtýynsha, árbir jergilikti atqarýshy bılik konkýrstyq negizde sıfrlyq platforma usynýshy kompanııalardyń servıstik qyzmetin satyp alady. Al el ishinde IT kompanııalar óte kóp. Munyń ózi IT ónimder naryǵynyń respýblıkada joǵary qarqynmen damyp jatqanyn kórsetedi. О́z kezeginde bul ortada básekelestik týdyryp, mektepterdiń sapaly sıfrlyq platformalardy satyp alýǵa múmkindik beredi.
A.Ilııasov jergilikti ákimdiktermen birlesip ınternet máselesin de sheship jatqanyn málimdedi. El boıynsha 7 600 mektep sapaly ınternetke qosylǵan. Shilde aıynda bilim oshaqtaryndaǵy ınternet jyldamdyǵy álsiz bolyp, ol tamyzda óz sheshimin tapqan. 2024 jyly respýblıkadaǵy bilim uıalarynda tehnıkalyq múmkindik 80%-ǵa jaqsarady. Al qala men aýyldardaǵy mektepterdiń aıyrmashylyǵyn azaıtý maqsatynda osy jyly Aqtóbe oblysynda qanatqaqty jobany bastaý kózdelip otyr. Ol shaǵyn jınaqty mektepterdi jańǵyrtýǵa baǵyttalǵan. Osyǵan baılanysty 134 mektep tańdalǵan. Olardyń barlyǵy kompıýterlik tehnıkamen qamtamasyz etiledi. Búgingi tańda pedagogter men mektep ákimshilikteri ınnovasııalyq jolmen bilim berý men sıfrlyq múmkindikterdi paıdalaný boıynsha arnaıy kýrstan ótken. Sonymen birge elektrondy oqýlyqtarǵa tegin qoljetimdilik bolady. Bul tájirıbe keıin respýblıka kóleminde búkil mektepke taratylady. Iаǵnı kompıýtermen jabdyqtalý, muǵalimderdiń biliktiligin arttyrý óńirlerdegi bilim oshaqtarynda kezeń-kezeńmen júzege asyrylady. Aıta ketý kerek, Shymkent qalasy mektepterdi sıfrlandyrý jáne muǵalimderdiń sıfrlyq áleýetin arttyrý úderisi boıynsha óńirler arasynda úzdik úshtikke endi.
ShYMKENT
