О́ńirde úsh aýysymdy mektepterdi jáne oryn tapshylyǵyn joıý maqsatynda byltyr 710 oryndyq 4 mektep salynyp, qoldanysqa berilgen edi. Bıyl 16 mekteptiń qurylysy júrgizilip jatyr. Onyń 9-y 1 qyrkúıekte paıdalanýǵa berildi. Sonyń biri – Eńbekshiqazaq aýdanynyń ortalyǵy Esik qalasyndaǵy №6 mektep-lıseıi. Onyń ashylý saltanatyna Almaty oblysy ákiminiń orynbasary Nurjan Qudaıbergenov qatysyp, ustazdar men oqýshylardy, ata-analardy jańa oqý jylynyń bastalýymen quttyqtady.
– Oblysymyzda aldaǵy ýaqytta «Jaıly mektep» ulttyq jobasy aıasynda 53 mektep salý josparlanyp otyr. Sondaı-aq óńirde jeke ınvestordyń esebinen 1 800 oryndyq 2 mektep salynyp jatyr. Búgin paıdalanýǵa berilgen 1 500 oryndyq jańa mektep buǵan deıin úsh aýysymda jumys istep kelgen Tereshkova, Toqataev, №1 Rahat orta mektepteriniń problemasyn sheship otyr. Mektep qurylysyn «BI Global» seriktestigi júrgizdi. Endigi kezekte osyndaı záýlim mektepte oqıtyn balalar bizdi jaqsy jetistikterimen qýantady dep senemiz, – dedi ol.
Jańadan salynǵan mektep-lıseı oqýshylardy tek qazaq tilinde oqytady. Bilim ordasy sońǵy úlgidegi tehnologııamen jabdyqtalǵan 82 kabınetten turady. Sondaı-aq lıseıde kitaphana, eki sport zaly, onyń biri 310 oryndyq jyljymaly elektr platformasy bar akt zalymen biriktirilgen, eki kıim iletin bólme jáne úsh júzge jýyq bala bir mezgilde tamaqtanatyn ashana bar. Nysan úsh qabattan jáne úsh bloktan turady. Oqý ǵımaratynda talapqa saı shaǵyn fýtbol, basketbol alańy men júgirý joly salynǵan.
– Osy mekteptiń salynatynyn estigende qýanyp, paıdalanýǵa berilýin asyǵa kúttik. Sebebi buǵan deıin balalarym úsh aýysymdy mektepte oqyp keldi. Endi, mine, sáýletti de keń mektepke nemerelerimdi ákelip otyrmyn. Bek qýanyshtymyz, – dedi qala turǵyny R.Maldybaıqyzy.
Esik qalasyndaǵy mektep-lıseıge Bilim kúni 570 bala partaǵa otyryp, sabaqtaryn bastady.
Dál osyndaı qýanyshty sátti Ile aýdany, Boraldaı aýylyndaǵy №54 orta mekteptiń ashylý saltanatyna qatysqan turǵyndar da bastan ótkerdi. 1 500 oryndyq jańa mektep osy ýaqytqa deıin úsh aýysymda jumys istegen №17 orta mekteptiń máselesin túbegeıli sheshti. Búgingi tańda atalǵan mektepke 1 200 oqýshy qabyldanyp, 52 synyp ashyldy. Mektep qurylysyn «BI Global» seriktestigi júzege asyrdy.
Bul kúni Ile aýdanynda taǵy eki mektep – Mejdýrechensk aýylyndaǵy 1 500 oryndyq №55 orta mektep jáne Kókqaınar aýylynda 1 500 oryndyq №53 orta mektep oqýshylarǵa esigin aıqara ashty. Atalǵan mektepter oqýshylardy qazaq tilinde oqytady ári eki aýysymda jumys isteıdi.
Sondaı-aq bul kúni Jambyl aýdanynyń Uzynaǵash aýylynda 1 500 oryndyq №1 mektep-lıseıi jumysyn bastady. Qaskeleń qalasynda 1 500 oryndyq mektep-gımnazııasy, Qarasaı aýdanynyń Almalybaq jáne Irgeli orta mektepterine qosymsha 600 oryndyq japsarlas ǵımarattar, Qonaev qalasynda 900 oryndyq orta mektep paıdalanýǵa berildi. Qalǵan bes mekteptiń qurylysy jyl sońyna deıin aıaqtalady dep kútilip otyr.
Almaty oblysy
